Տղաների ականջները ձգելու հերթն ու Արփինե Հովհաննիսյանի դիկտատուրան

Ազգային ժողովում ՀՀԿ-ական պատգամավորներ Կարեն Ավագյանի և Հրայր Թովմասյանի ներկայացրած `բժիշկների դեմ բռնություն գործադրողների պատիժը խստացնելու մասին օրենքի նախագծի  առաջին ընթերցման քննարկումն ու քվեարկությունը դրամատիկ ստացվեց: Նույնիսկ ընդդիմադիր «Ելքը»,ընդունելով իշխանության հիմնավորումները, թե օրենքը միտված է այն նպատակին, որպեսզի պաշտպանության տակ վերցվեն մարդկային կյանքերի համար պատասխանատու բժիշկներին, համաձայնեց կողմ քվեարկել, սակայն ՀՀԿ-ում գտնվեցին մարդիկ, որոնք ավելի կաթոլիկ գտնվեցին:Ինչպես հայտնի է, այս փոփոխությամբ նախատեսվում է բժշկական օգնություն և սպասարկում իրականացնող անձանց կամ բուժաշխատողների օրինական մասնագիտական գործունեությանը խոչընդոտելը՝ պատժել տուգանքով` նվազագույն աշխատավարձի 200-ապատիկի չափով: Նույն արարքը, որը կատարվել է բուժաշխատողի նկատմամբ բռնություն գործադրելով կամ դա գործադրելու սպառնալիքով` պատժել ազատազրկմամբ` երեքից յոթ տարի ժամկետով:Նախ ելույթ ունեցավ  ՀՀԿ-ական պատգամավոր, ազգությամբ եզդի  Ռուստամ Մախմուդյանը և ասաց,քանի որ հանձնաժողովի նիստին նախագծի քննարկմանը ներկա չի եղել, այդ պատճառով ցանկանում է անպայման իր նկատառումները ներկայացնել: Մախմուդյանն ասաց,  որ նախագիծը ներկա տեսքով, ներկա պահին ժամանակավրեպ է, բացի այդ չի կարծում, թե շտաբօգնության մեքենայի առջեւ փակելը մարդու կյանքի եւ առողջության նկատմամբ հանցագործություն է: Նա ասաց, որ եթե ունենայինք վիճակագրություն, որ իսկապես, տարեկան 40-50 բժշկի նկատմամբ է բռնարարք կիրառվում, ապա ինքը կողջուներ նախաձեռնությունը:  Նախագիծը ներկայացնող Արփինե Հովհաննիսյանը խիստ դաստիարակի տեսք  ընդունած չպատասխանեց կուսակցական գործընկերոջ դիտարկմանը: Ասաց`դրա համար կուսակցական հարթակ կա: Ավելի ուշ Մախմուդյանը, Հրայր Թովմասյանը և Արփինե Հովհաննիսյանն այս հարցը շարունակեցին քննարկել նախ խորհրդարանի միջանցքում, ապա Հրայր Թովմասյանի աշխատասենյակում: Փոխարենը երկու ՀՀԿ-ական պատգամավորներ Արթուր Գևորգյանն ու Միհրան Պողոսյանը ընդվզեցին ու դեմ քվեարկեցին նախագծին: Այսպիսով, բավականին խորհրդանշական պատկեր ստեղծվեց իշխանական հարթակում, մի կողմից՝ Արփինե Հովհաննիսյանը որպես ոհմակային մտածողության կարկառուն ներկայացուցիչ անգամ հարկ չհամարեց կուսակցին հրապարակային պատասխան տալը, ի վերջո, ցույց տալով, որ ՀՀԿ-ում ժողովրդավարական մթնոլորտ է եւ կարող է լինել գաղափարական տարաձայնություն կամ բախում, տիկին Հովհաննիսյանը  գուցեեւ համարեց, որ ով ով, բայց Ռուստամ Մախմուդյանը չունի այդ բարոյական իրավունքը՝ ընդվզելու իր ներկայացրած նախագծի դեմ, քանի որ մամուլը վերջերս գրեց, որ Մախմուդյանին ԵԽԽՎ հայաստանյան պատվիրակությունում ընդգրկելու առաջարկը եղել է հենց Արփինե Հովհաննիսյանի կողմից, որը Մախմուդյանի հետ մտերմություն ունի դեռ համալսարանից: Մյուս կողմից՝ ուշագրավ էր նաեւ երկու անհնազանդների դիրքորոշումը, որոն հատկապես հարկ չհամարեցին անգամ ելույթ ունենալու, ներկայացնելու իրենց դիրքորոշումը, թե ինչու են դեմ: Եթե քվեարկությունից հետո ոստիկանապետի փեսա Արթուր Գեւորգյանը կցկտուր բացատրեց, որ դեմ է խտրական մոտեցմանը եւ բռնությունը ցանկացած մասնագիտության տեր մարդու նկատմամբ հավասարապես նույնն է, ապա Միհրան Պողոսյանը տղայականով հրաժարվեց որեւէ բառ փոխանակել լրագրողների հետ: Գուցե սա ընդվզում էր Արփինե Հովհաննիսյանի անբռնազբոս դիկտատուրային, ինչը դրսեւորվեց հենց ԱԺ ամբիոնից, գուցե ընդամենը այս երկու պարոնայք ցանկացան անշառ մի նախագծի առիթով ինքնադրսեւորել եւ ցույց տալ, որ չնայած արմատական ընդդիմությունը կողմ է, սակայն, այ, իրենք այնքան սկզբունքային են, որ դեմ են: Միհրան Պողոսյանն օրենսդիր դաշտում նորեկ է, բայց Արթուր Գեւորգյանը պետք է , որ իմնա, որ ՀՀԿ-ում խաղի կանոններն այլ են: Չնայած վերջինս անցած խորհրդարանում հազվադեպ էր հաճախում նիստերին, մշտապես ընտանիքի հետ ԱՄՆ-ում էր ու հավանաբար չի յուրացրել կուսակցական ներքին չգրված կանոնադրությունը: Կարելի է չկասկածել, որ ՀՀԿ-ում իրենց պես լավ տղերքի կամ սկզբունքային անհատների պակաս չի զգացվում, որոնք ներքին համոզմանը դեմ գնալով քվեարկում են շատ ու շատ նախագծերի, քանզի լավ գիտեն, որ այդ խմբակում իրենց գոյությունը պայմանավորված է նախեւառաջ այն հանգամանքով, որպեսզի հլու-հնազանդ ենթարկվեն կուսակցական որոշումներին, այլապես նրանց ականջներն այնպես կձգեն, որ ոչ միայն պատգամավորական  գործունեության, այլեւ ողջ կյանքի ընթացքում այդ ցավն իրեն զգացնել կտա: Ու ամենեւին կապ չունի, թե ով ում բարեկամն է, ով ՝ում փեսան: Անի Սահակյան