Քելլոգը կայցելի Ուկրաինա․ Զելենսկի

Ռուսաստանի և Ուկրաինայի հարցերով ԱՄՆ նախագահի հատուկ ներկայացուցիչ Քիթ Քելլոգը փետրվարի 20-22-ը կայցելի Ուկրաինա։ Այս մասին Վլադիմիր Զելենսկին հայտարարել է ԱՄԷ-ում կայացած մամուլի ասուլիսում, որից հատվածներ մեջբերել է Ukrinform գործակալությունը։ Այս մասին փոխանցում է Euromedia24-ը։

«Մենք սպասում ենք Քելլոգին, մենք պայմանավորվածություն ունեինք, որ նա կժամանի 20-ին, կարծես թե երկու օրով, գուցե և ավելի», -ասել է նա:

Զելենսկին հավելել է, որ նախատեսված են հանդիպումներ ԱՄՆ նախագահի ներկայացուցիչ և Ուկրաինայի զինված ուժերի գերագույն գլխավոր հրամանատար Ալեքսանդր Սիրսկու և պաշտպանության նախարար Ռուստեմ Ումերովի միջև։

«Կարծում եմ, որ նրա հանդիպումներից և ԱՄՆ վերադառնալուց հետո մենք կհասկանանք, թե երբ կկայանա իմ հանդիպումը ԱՄՆ նախագահ Դոնալդ Թրամփի հետ»,- նշել է նա։

Փետրվարի 18-ին Բրյուսելում Քելլոգը հանդիպելու է Եվրահանձնաժողովի ղեկավար Ուրսուլա ֆոն դեր Լայենի հետ, Վարշավայում նախատեսված է Քելլոգի հանդիպումը Լեհաստանի նախագահ Անջեյ Դուդայի հետ։