ՔՊ-ն քննարկումների մեջ է

Հրապարակ օրաթերթը գրում է․

ՔՊ-ական պատգամավոր Հայկ Սարգսյանի հեղինակած աղմկահարույց նախագիծը, որի պատճառով նախորդ շաբաթ նա իր թիմակիցների հետ թեժ վեճի մեջ մտավ եւ մի կերպ անցկացրեց ԱԺ հանձնաժողովի նիստում, չի ընդգրկվել երեկ մեկնարկած ԱԺ նիստերի օրակարգում, ինչպես լինում է սովորաբար, երբ գլխադասային հանձնաժողովը դրական եզրակացություն է տալիս նախագծին։ Խոսքը բուքմեյքերական ընկերությունների համար 10 տոկոս շրջանառության հարկ սահմանելու նախագծի մասին է, որի առիթով պատգամավորն առաջարկում էր փոխել Հարկային օրենսգիրքը եւ բացի այն հարկերից եւ տուրքերից, որոնք այժմ գոյություն ունեն, այս ընկերություններին հարկել նաեւ շրջանառության 10 տոկոսի չափով։ Հանձնաժողովի նիստում պատգամավորն իր կուսակիցներին մեղադրեց, թե` բուքմեյքերական բիզնեսմենների շահերն եք պաշտպանում։ Ի վերջո, հանձնաժողովի 3 ՔՊ-ական անդամ կողմ քվեարկեց, 2-ը` դեմ։ Սակայն ԱԺ խորհրդի նիստի ժամանակ սոցիալական հարցերի հանձնաժողովի ղեկավար Հերիքնազ Տիգրանյանի առաջարկով նախագիծը չի ներառվել օրակարգում։ Որոշ տեղեկություններով, այս նախագծի շուրջ խմորումները շարունակվել են կուլիսներում` բուքմեյքերների հետ մտերմություն ունեցող պատգամավորներն են Տիգրանյանին խնդրել, որ «վետո» դնի նախագծի վրա:

Միեւնույն ժամանակ Նիկոլ Փաշինյանին են դիմել, թե չի կարելի հենց այնպես վնասել այս բիզնեսին, հատկապես որ նախագծով խաղամոլության դեմը չենք առնում։ Հայկ Սարգսյանին հարցրինք՝ ինչո՞ւ նախագիծը չի ընդգրկվել օրակարգում։ «Ինձ վարչապետի աշխատակազմից դիմել են, որպեսզի նախագիծը եւս մեկ անգամ քննարկվի՝ վարչապետի գլխավորությամբ»,- ասաց նա։ Հիշեցնենք, որ կառավարությունն էլ նախապես դրական էր արտահայտվել նախագծի մասին, ապա հրաժարվել էր դրական եզրակացություն տալ` առաջարկելով նորից քննարկել այն: Քննարկումը տեղի կունենա այսօր՝ կառավարությունում, որին կմասնակցեն նաեւ պատգամավորները։