ՀՀԿ-ական պատգամավորը ձևը գիտի

Հայաստանում աղքատությունը կազմում է 30 տոկոս, և այն իսպառ վերացնելու համար տարեկան պետք է 200 մլրդ դրամ, այսօր խորհրդարանում 2018 թվականի բյուջեի նախագծի քննարկման ժամանակ ասաց ԱԺ սոցիալական հարցերի մշտական հանձնաժողովի նախագահ Հակոբ Հակոբյանը: Ինչպես ասաց՝ տարեկան Հայաստան մտնող մասնավոր տրանսֆերտները կազմում են 1.2-1.4 մլրդ դոլար: Այսինքն՝ 500-600 մլրդ դրամ փող մենք ստանում ենք ոչ պետական ֆինանսավորմամբ: «Մեզ այսօր պետք է շուրջ 125 մլրդ դրամ փող, որ ուղիղ հասցնենք մեր աղքատ խավին, 30 տոկոսին, և նրանք բոլորն աղքատ չեն լինի, մենք կունենանք աղքատություն չունեցող երկիր: Պրակտիկան ասում է հետևյալը. որպեսզի 120 մլրդ փողը դու կարողանաս հասցնես հասարակությանը, պետք է այդքան էլ գումարես, ունենաս շուրջ 200 մլրդ փող, որպեսզի բոլոր օղակներից հասնի աղքատին: Մենք պետական բյուջեում նախատեսել ենք 40 մլրդ դրամ փող աղքատության վերացման համար», - հայտարարեց պատգամավորը՝ նշելով, որ աղքատության պխատճառը պետական կառուցվածքի ոչ ճիշտ ինֆորմացիոն համակարգն է, ոչ ճիշտ հսկողության մեխանիզմն է: «Առաջինը՝ պետք է ունենալ ճիշտ պետություն, կառուցվածք բոլոր համակարգերով, սա համար մեկ խնդիրն է: Պետք է ունենալ ճիշտ պետական համակարգ, որը կլինի հասանելի և ընկալելի», - ասաց նա: