Զգույշ եղեք. Վահրամ Բաղդասարյան

Խորհրդարանում` բյուջեի նախագծի քննարկման ժամանակ, ՀՀԿ խմբակցության ղեկավար Վահրամ Բաղդասարյանն անդրադարձավ քննադատություններին՝ նշելով, որ օրենքը հավասար է բոլորի համար, առավել ևս հարկային դաշտում բոլորը պետք է լինեն հավասար:  «ՊԵԿ-ի սուրբ պարտականությունն է, որ ինքը ապահովի հարկային հավասար դաշտ: Եվ մենք՝ որպես խորհրդարանական վերահսկողություն, պետք է ինչ-որ տեղ նաև պարտադրենք, որպեսզի ՊԵԿ-ը իր պարտականությունները կատարի, բայց ոչ թե խոչընդոտենք նրանց, դա շատ վտանգավոր է»,- ասաց նա: Նա անդրադարձավ վերջին օրերին «Ծառուկյան» խմբակցության կողմից ԱԺ-ում բարձրաձայնվող՝ «Առինջ մոլում» ՓՄՁ ներկայացուցիչների և ՊԵԿ աշխատողների միջև տեղի ունեցած միջադեպերին. «Այստեղ այս քննարկումների արդյունքում մենք մեկ մոլում տեղի ունեցածով գնահատական ենք տալիս ՊԵԿ-ին, չի կարելի, գնահատականը պետք է տրվի ընդհանուր գործառույթների համար: Մենք պետք է հետևողական լինենք ոչ թե մեկ մոլի, այլ բոլոր տնտեսվարող սուբյեկտների նկատմամբ, իսկ եթե այդտեղ կան վայրագություններ, դրանք պետք է բացահայտվեն ու պատժվեն: Արհեստական մոնոպոլ կառույցները պետք է արմատախիլ արվեն: Երբ մենք այստեղ քննադատություններ ենք հնչեցնում, մենք պետք է ինքներս մեզ հաշիվ տանք՝ մենք ի՞նչ ենք արել մեր երկրի համար և ի՞նչ իրավունք ունենք պահանջելու: Այստեղ նստած քննադատողներից շատերը եղել են այն պոստերին, որոնք ի վիճակի են կոռուպցիոն ռիսկերը կրճատելու: Բոլորս՝ ինձնից սկսած, պետք է մեզ հարց տանք՝ մենք նպաստե՞լ ենք կոռուպցիոն ռիսկերի ավելացմանը, թե՞ ոչ: Եվ մեր ելույթներում պետք է զգույշ լինենք, որ նման քննադատությունների չարժանանանք»: