Մենք երբեք չենք ասել, որ մի զարկով աղքատությունը կվերանա. Շարմազանովի արտահերթ ելույթը

ԱԺ-ում այսօր 2018թ. պետական բյուջեի նախագծի քննարկմանը ԱԺ փոխխոսնակ Էդուարդ Շարմազանովը հանդես եկավ արտահերթ ելույթով: «Մենք երբեք չենք ասել, որ մի զարկով աղքատությունը կվերանա, երբեք չենք ասել, որ աշխատավարձերն ու թոշակները ավելանալու են: Ադրբեջանում տնտեսական աճը -0,9-1 տոկոսանոց աճ է՝ սա ես չեմ ասում, այլ աշխարհին հայտնի փաստ է, ՌԴ-ում՝ -1,8 տոկոս, Բելառուսը՝ 0,7 տոկոս, Ղազախաստանում՝ 3,3 տոկոս, իսկ մեզ մոտ՝ եկող տարվա բյուջեի հիմքում 4,5-5 տոկոսանոց աճն է: Այս բյուջեն կայունացման բյուջե է, երկարտեւ աճ ապահովելու բյուջե է: Այս բյուջեով 28 մլրդ դրամով ավելանում են պաշտպանական ծախսերը, 32 մլրդ-ով՝ անվտանգության ծախսերը: Ես կողմ եմ աշխատավարձերը, նպաստները բարձրացնելուն, սակայն ոչ՝ անվտանգության հաշվին: Մենք մարդկանց պետք է ոչ թե ձուկ տանք, այլ ձուկ բռնել սովորեցնենք»,- ասաց նա: Նրա խոսքով՝ 2018 թվականի բյուջեի նախագիծը բխում է մեր քաղաքական ուժի և Դաշնակցության համատեղ քաղաքական նախընտրական ծրագրից, կառավարության 5-ամյա ծրագրից։ «Առնվազն անհասկանալի է, երբ այս բյուջեում փորձում ենք տեսնել բաներ, որոնք օբյեկտիվորեն չեն կարող լինել։ Սիրելիներս, մենք երբեք չենք ասել, որ  2018թ. աշխատավարձերը, թոշակները պետք է 100 կամ 150 տոկոս ավելանան»,-ասաց Շարմազանովը։ Խորհրդարանի փոխնախագահը կոչ արեց պատգամավորներին կողմ քվեարկել բյուջեի նախագծին