Լավրովը «պասը» վերցրեց ու շտապում է Երևան

Ռուսաստանի արտգործնախարար Սերգեյ Լավրովը կայցելի Հայաստան և Ադրբեջան, երեկ այս մասին հայտարարել է ինքը՝ նախարարը: «Հաջորդ շաբաթվա սկզբին նախատեսված են իմ այցերը Երևան և Բաքու: Առաջին հերթին այդ այցերը նվիրված են ՌԴ կողմից դիվանագիտական հարաբերությունների հաստատման 25-ամյակին ՀՀ և Ադրբեջանի հետ», - ասել է Լավրովն ու հավելել. «Օրակարգը կներառի երկկողմ հարաբերությունները, որոնք այդ երկրներից յուրաքանչյուրի հետ հագեցած են ու հարուստ: Կխոսենք տարածաշրջանային և միջազգային խնդիրների մասին, այդ թվում կաշխատենք հասկանալ, թե որտեղ ենք գտնվում ղարաբաղյան կարգավորման հարցում Ժնևում Հայաստանի և Ադրբեջանի նախագահների հոկտեմբերի 16-ին կայացած հանդիպումից հետո», - ասել է ՌԴ ԱԳ նախարարը: Նկատենք, որ այս նորությունը հաջորդեց աշխատանքային այցելությամբ Մոսկվայում գտնվող ԱԳ նախարար Էդվարդ Նալբանդյանի և ԵԱՀԿ Մինսկի խմբի համանախագահների հետ և ԵԱՀԿ գործող նախագահի անձնական ներկայացուցիչ Անջեյ Կասպրշիկի հետ հանդիպմանը, որի ընթացքում մտքեր են փոխանակվել ղարաբաղյան հիմնախնդրի բացառապես խաղաղ կարգավորման գործընթացի առաջմղման համար բարենպաստ պայմանների ստեղծման ուղղությամբ անհրաժեշտ քայլերի վերաբերյալ: Սա միակ նորությունը չէ: Պաշտոնական Բաքուն Լավրովի այցի ֆոնին՝ որոշեց դիրքորոշումը ներկայացնել ԼՂ խնդրի վերաբերյալ: Պաշտոնական Բաքվի սկզբունքային դիրքորոշումը ղարաբաղյան հարցում չի փոխվել՝ հակամարտությունը պետք է կարգավորվի Ադրբեջանի տարածքային ամբողջականության շրջանակներում, երեկ «ազդարարել» է Իլհամ Ալիևը իշխող կուսակցության՝ «Ենի Ազերբայջանի» հիմնադրման 25-֊ամյակին նվիրված հանդիպման ժամանակ ու հիշել Ղարաբաղի մասին հին երգերը: Ալիևը նաև պնդել է, թե Ադրբեջանում որևէ քաղաքական ուժ չի կարող մրցել իր ղեկավարած կուսակցության հետ: «Մեր երկրի հաջող զարգացումը հստակ ցույց է տալիս, որ ներկայիս իշխանության վարած քաղաքականությունը միակ ճիշտ ընտրությունն է», - հայտարարել է Ալիևը՝ պնդելով, թե իշխող կուսակցության շարքերում ավելի քան 700 հազար մարդ կա, մեծ մասը՝ երիտասարդներ: Ի՞նչ է ստացվում: Նախօրեին Սոչիում հանդիպեցին Ռուսաստանի ու Թուրքիայի նախագահները, իսկ Էրդողանը օրեր առաջ վստահեցրել էր, թե դիմելու է Պուտինին՝ ԼՂ խնդրի հարցով, քանի օր միայն Պուտինը կարող է այն լուծել: Ու հանկարծ, այս ֆոնին Լավրովը շտապում է հայտնել, թե գալիս է Երևան ու Բաքու՝ նաև ղարաբաղյան խնդիրը քննարկելու հարցով: Իսկ ի՞նչ կա քննարկելու, երբ Ալիևը չի կատարում միջնորդների ներկայացրած պահանջները և համաձայնություն չի տալիս սահմանային միջադեպերի հետաքննության մեխանիզմների ներդրմանը: Թե՞ Լավրովը Էրդողանի ու Ալիևի ակնկալիքների մասին մեսիջնե՞ր է բերելու Երևան: Մետաքսյա Շալունց