Գրիգորի Խաչատուրովի, Սեյրան Օհանյանի և ևս հինգ անձի վերաբերյալ գործից դրվագն անջատվել է «մայր գործից», կքննվի Պատրոն Դավոյի, Ստեփան Գալստյանի գործից առանձին

Դատարանը գեներալ Գրիգորի Խաչատուրովի, Սեյրան Օհանյանի և ևս հինգ անձի վերաբերյալ դրվագն առանձնացրել է «մայր գործից» և կքննի` «Պատրոն Դավոյի», Ստեփան Գալստյանի, Ավետիք Մուրադյանի վերաբերյալ դրվագից առանձին վարույթում:

Հիշեցնենք, որ քրեական գործը վերաբերում է հողատարածքի օտարմանը։ Գրիգորի Խաչատուրովի նկատմամբ քրեական հետապնդում է հարուցվել՝ պաշտոնեական դիրքի օգտագործմամբ հանցավոր ճանապարհով ձեռք բերված առանձնապես խոշոր չափերով անշարժ գույքն օրինականացնելու (փողերի լվացում) հատկանիշներով:

Նկատենք, որ ըստ դատախազության, գործարքի առարկան չգործող զորամասի տարածքն է, որը պաշտպանության նախարար Սեյրան Օհանյանի պաշտոնավարման տարիներին, իբր, վաճառվել է Գրիգորի Խաչատուրովին, ինչը ձեւակերպվել է երրորդ անձի անվամբ։ Գործով մեղադրյալները 13-ն են, այդ թվում՝ ՊՆ նախկին նախարար Սեյրան Օհանյանը, գեներալ Գրիգորի Խաչատուրովը։

Քրեական գործը դատարանում է 2023թ.-ից, շուրջ երկու տարի քննությունից հետո Հակակոռուպցիոն դատարանը` դատավոր Արամ Գրիգորյանի նախագահությամբ, 2025թ հունվարին որոշում է կայացրել յոթ անձի` Սեյրան Օհանյանի, Մանուկ Վարդանյանի, Հակոբ Մարտիրոսյանի, Արմեն Հրանտի Գևորգյանի, Նորայր Կարապետյանի, Գրիգորի Խաչատուրովի, Էդգար Արշակյանի մասն անջատել և քննել առանձին վարույթով: Այս դրվագը ևս մակագրվել է դատավոր Արամ Գրիգորյանին:

Այսպես ասած, «մայր գործով» մեղադրյալի կարգավիճակում են «Պատրոն Դավո» մականունով Դավիթ Գալստյանը, ՀՀ ԶՈՒ ԳՇ պետի նախկին տեղակալ Ստեփան Գալստյանը, Զինված ուժերի ավիացիայի վարչության նախկին պետ Ավետիք Մուրադյանը, Արտիկ Թովմասյանը: Նշենք, որ այս գործով անցնող Դավիթ Գալստյանը, Ավետիք Մուրադյանը և Ստեփան Գալստյանը մեղադրյալի կարգավիճակ ունեն նաև, այսպես կոչված, «Անպիտան հրթիռների» ` ՊՆ նախկին նախարար Դավիթ Տոնոյանի և մյուսների վերաբերյալ գործով:
Հեղինակ` Իզաբել Սահակյան

Աղբյուր` Փաստինֆո