Թաիլանդի իշխանությունները մայրաքաղաքում տրանսպորտը դարձրել են անվճար

Թաիլանդի իշխանությունները շաբաթ օրվանից Բանգկոկում մեկ շաբաթով անվճար են դարձրել հանրային տրանսպորտը։ Դա օդի աճող աղտոտվածության դեմ պայքարի վերջին մարտավարությունն է, որն արդեն ստիպել է հարյուրավոր դպրոցներ փակել, իսկ աշխատակիցներին՝ աշխատել տնից, տեղեկացրել է Associated Press-ը:

Երթեւեկության արտոնությունը ուղեւորներին հնարավորություն է տալիս անվճար երթեւեկել մայրաքաղաքում ավտոբուսներով, վերգետնյա եւ ստորգետնյա էլեկտրագնացքներով։ Իշխանությունները հույս ունեն, որ այս քայլը կնվազեցնի մասնավոր մեքենաների թիվը ճանապարհներին՝ նվազեցնելով աղտոտվածության աճ առաջացնող հիմնական գործոններից մեկը:

Ուրբաթ Թաիլանդի վարչապետ Պաետոնգտարն Շինավաթրան մտահոգություն է հայտնել այս հարցի վերաբերյալ։ Նա ասել է, որ իր կառավարությունը հավատարիմ է խնդրի լուծմանը կարճաժամկետ եւ երկարաժամկետ միջոցներով:

Օդի աղտոտվածությունը երկար տարիներ խնդիր է Հյուսիսային Թաիլանդում, որի հիմնական գործոնն անտառների եւ գյուղատնտեսական թափոնների այրումն է: Վերջին տարիներին Բանգկոկը տառապում է աղտոտիչների բարձր մակարդակից, հատկապես ցուրտ ամիսներին:

Դրանում մեղավոր են, մասնավորապես, մեքենաների եւ գործարանների արտանետումները, ինչպես նաեւ շինհրապարակների փոշին:

Շաբաթ օրը շվեյցարական IQAir առեւտրային մոնիթորինգի ծառայությունը Բանգկոկն անվանել է աշխարհի 14-րդ ամենաաղտոտված քաղաքը, որտեղ օդի որակը մոտ է անառողջին բոլորի համար:

NEWS.am