Եկեղեցին մոմ է վաճառում, ինչի՞ պիտի ՀԴՄ չտա. Փաշինյան
Պետության և եկեղեցու հարաբերություններն այսօր այնպիսին են, ինչպիսին պետք է լինեն, որովհետև պետությունը չպետք է խառնվի եկեղեցու գործերի մեջ, եկեղեցին էլ չպետք է խառնվի պետության գործերի մեջ։ Այս մասին շվեյցարահայ համայնքի հետ հանդիպմանն ասել է ՀՀ վարչապետ Նիկոլ Փաշինյանը։
«2018 թ-ին ինձնից շատերը պահանջում էին, ասում էին՝ Հայ առաքելական եկեղեցին պետք է ունենա նոր կաթողիկոս։ Ես հրապարակային ասել եմ՝ կառավարության ի՞նչ գործն է, թե ով է կաթողիկոսը։ Կաթողիկոսը ամենայն հայոց կաթողիկոսն է, ՀՀ-ինը չէ միայն»,-ասաց նա, ընդգծելով, թե այն ժամանակ էլ մեղադրանքներ կային, թե իրենք են կազմակերպում այդ ընդվզումները։ «Եթե մենք կազմակերպեինք՝ 2018 թ-ին շատ արագ արդյունքի կհասնեինք, բայց դա մեր օրակարգի հարց չի եղել»։
Նա նշեց, որ իր կարծիքով՝ եկեղեցին պետք է լինի թափանցիկ։ «Մեզնից բոլորը թափանցիկություն են պահանջում, մենք համաձայն ենք, նույնիսկ նրանք, ովքեր մեզ մի անգամ բարև են տվել՝ պետք է լինեն թափանցիկ, իսկ եկեղեցին ինչո՞ւ պետք է թափանցիկ չլինի։ Մենք Հայաստանում ունենք օրենք, ասում ենք, եթե մի բան վաճառում ես՝ պետք է տաս ՀԴՄ կտրոն։ Եթե մոմ ես վաճառում, ինչի՞ պիտի ՀԴՄ կտրոն չտաս։ Ասում են՝ եկեղեցին ուզում եք հարկե՞ք, ասում ենք, որ ուզում ենք հարկային օրենսդրությունը գործի, բայց մենք պարտավորվում ենք, որ ինչքան հարկ ձևավորվի եկեղեցու գործունեության արդյունքում՝ ամբողջը վերադարձնել եկեղեցուն, հակառակը, եթե պարզվի, որ լրացուցիչ ֆինասավորում է պետք եկեղեցու բնականոն գործունեությունը ՀՀ տարածքում ապահովելու համար՝ կմտածենք լրացուցիչ ֆինանսավորում տալու համար։
Ի՞նչն ենք սխալ ասում»։
Հետևեք մեզ Viber-ում
