Վաչե Գաբրիելյանը հակադարձում է Արամ Սարգսյանին

Ազգային ժողովի «Ելք» խմբակցությունը հարցապնդում է ներկայացրել Երևանի «Զվարթոնց» և Գյումրու «Շիրակ» օդանավակայանների չվերթերի վերաբերյալ: Այսօր ԱԺ հերթական նիստի ժամանակ ՀՀ փոխվարչապետ Վաչե Գաբրիելյանը պատասխանեց նրանց կողմից ներկայացված մի շարք հարցերին:Ժ «Ելք» խմբակցության պատգամավոր Արամ Սարգսյանի պնդմամբ Հայաստանից ավիատոմսերի գները թանկ են: «Դրանք թանկ են մի քանի պատճառներով՝ առաջինը օդի հարկն է, որը չունի Վրաստանը, բայց մենք ունենք: Ժամանակն է դա հանել: Երկրորդը՝ ավիավառելիքի բարձր գներն են՝ 1 տոննայի համար 800 դոլար գինը Հայաստանում է, 500 դոլար Ռուսաստանում, 200 դոլար՝ հարևան Իրանում: Եվ մյուս պատճառը, որ ավիատոմսերը թանկ են այն է, որ օդանավակայանը սպասարկման բարձր գներ է սահմանել: Այս ուղղություններով պետք է աշխատանքներ տանել», - հայտարարեց Արամ Սարգսյանը: Գաբրիելյանն ի պատասխան ասաց, որ անգամ օդի հարկի պարագայում՝ Թբիլիսի-Մոսկվա թռիչքները շուրջ 20 դոլարով թանկ են, քան Երևան-Մոսկվա թռիչքները. «Սա նշանակում է, որ այստեղ օդի հարկը նշանակություն չունի: Իսկ Գյումրիում ընդհանրապես օդի հարկ չկա: Ինչ վերաբերում է վառելիքի գնին, մենք առնում ենք միջազգային շուկայում ու ոչ մեկ աղբյուրից՝ Իրանից, Բուլղարիայի, Ռումինիայից և այլ տեղերից: Վառելիքի գնային միակ տարբերությունը տրանսպորտային ծախսերն են, դրանք հնարավոր չէ չեղարկել, քանի որ այն պետք է Վրաստանով հասնի Հայաստան: Սպասարկման գների մեջ էլ կա բազմազանություն»: Գաբրիելյանն ասաց, որ Հայաստանն ավիավառելիք գնում է տարբեր աղբյուրներից՝ Բուլղարիայից, Ռումինիայից, Իրանից և այլ տեղերից. «Մեզ մոտ այս տարի տեղի է ունեցել գների իջեցում, թռիչքների քանակի անհամեմատ մեծացում, անցյալ տարվա ուղևորափոխադրումների քանակը հատել ենք ու ունենք 122 տոկոս աճ: Բաց երկնքի քաղաքականությունը բերել է ավելի մատչելի ու ավելի շատ թռիչքների»: