Բանավեճ՝ Արծվիկ Մինասյանի ու Ալեն Սիմոնյանի միջև

«Հայաստան» խմբակցության պատգամավոր Արծվիկ Մինասյանն այսօր մեկնարկած ԱԺ նստաշրջանի սկզբին հարց ուղղեց ԱԺ նախագահ Ալեն Սիմոնյանին՝ հետաքրքրվելով, թե Հայաստանի մակետը, որ փակցվել է ԱԺ նախագահության ամբիոնի գլխավերևում, ի՞նչ չափանիշների է համապատասխանում։ «Օրինակ, մենք Սևանից բացի ուրիշ լիճ չունե՞նք, որ չի երևում էստեղ, երկրորդ՝ Սևանը դատարա՞կ է։ Եթե խոսում ենք որակի մասին, նպատակին մասին, պարոն Ռուբինյանն էլ հերթական կեղծիքների չափաբաժինն է բաց թողնում, ո՞վ է պատվիրատուն և ինչ չափանիշներով է սահմանված, որ ՀՀ-ի տարածքի մակետը էս տեսքը պետք է ունենա ու այս տեսքով պետք է լինի»,-հարցրեց Մինասյանը։

ԱԺ նախագահ Ալեն Սիմոնյանն էլ պատասխանեց, որ ուրախ է, որ ընդդիմադիրները վերջապես ճանաչել են, որ այն, ինչ պատկերված է մակետում՝ ՀՀ-ն է։ «Մինչ օրս էստեղից հարցնում էին, թե ՀՀ-ն ինչ տարածք ունի, քանի քկմ է։ Հիմա ՀՀ-ն քանի քկմ է՝ ըստ ձեզ, կասե՞ք»։

Արծվիկ Մինասյանն արձագանքեց, որ հետաքրքրական է, որ Սիմոնյանը չի պատասխանում իր հարցերին։ «Խնդիրը շատ ավելի խորն է, ՀՀ տարածքը 29 743 քկմ-ն է, բայց արդյո՞ք սա նշանակում է, որ դուք պետք ուրանաք, մոռանաք, հանձնեք, պրծնեք ՀՀ ինքնիշխան իրավազորության մեջ գտնվող տարածքները և փորձեք չքմեղանալ, թե ՀՀ-ն այսքան է, ընդ որում՝ դուք չեք կարող անգամ ցույց տալ, թե որն է այդ սահմանը, որն ամեն անգամ զիջում եք»։

Սիմոնյանն էլ հարցրեց, կա՞ տարածք, որ ՀՀ-ինն է ու այստեղ նկարագրված չէ։ «Ես սա եմ ճանաչում ՀՀ տարածք։ Ինչ մնում է իմ նկարը կպցնելուն՝ կարող եմ 004 շրջաբերականն էլ բերել էդտեղ կպցնել, որ հիշեք ՀՀ-ի մասին ձեր կուսակցության պատկերացումը»։

Աղբյուր` Փաստինֆո