«Անլուրջ կլինի քննարկել ուռճացված, շոու դարձված որևէ խնդիր». Մարգարիտ Եսայանը՝ «Ծառուկյան» դաշինքին
Այսօր Ազգային ժողովում «Ծառուկյան» խմբակցության պատգամավորները բարձրացրեցին փոքր և միջին ձեռնարկությունների խնդիրները, և ԱԺ-ում աժիոտաժ առաջացավ: Պատգամավոր Նաիրա Զոհրաբյանն էլ հայտարարեց, որ այն, ինչ արվում է մանր և միջին առևտրով զբաղվող ձեռներեցների հետ, ուղղակի տեռոր է, որպեսզի մարդիկ մեկ կտոր հացից զրկվեն: ԱԺ փոխնախագահ Միքայել Մելքումյանը հայտարարեց, որ ԱԺ բոլոր խմբակցություններին են դիմել տարբեր տոնավաճառների մի քանի հազար հայրենակիցներ՝ լուծելու բոլոր խնդիրները, որոնք առկա են: Նա ասաց, որ ինքն այդ հարցով դիմել է Պետական եկամուտների կոմիտեի (ՊԵԿ) նախագահին և վարչապետին. «ՊԵԿ նախագահից ստացել եմ համապատասխան պատասխան՝ կապված հարկային կոշտ վարչարարության անթույլատրելիության մասին, սակայն կյանքը ցույց է տալիս, որ օրենքները և պրակտիկան տարբեր բաներ են: Մենք արձանագրում ենք, որ պետք է դադարեցնել այն, որ տոնավաճառներում մարդկանց խուզարկում են, վաճառքների ժամանակ ասում են՝ բացեք ձեր տոպրակներն այն դեպքում, որ մեր առևտրականները սոցիալական բնույթ կրող գործունեությամբ են զբաղված: Մենք կարծում ենք, որ իրավունք չունեն օրենքին հակասող խուզարկություն և վարչարարություն իրականացնել: Բանը հասել է նրան, որ օպերատիվ հետախուզական ծառայության աշխատակիցները վրաերթի են ենթարկում տարբեր մարդկանց, և եղել են մի քանի բախումներ, և մենք պետք է վերացնենք այդ ամենը»: Մելքումյանը նաև հայտարարեց, որ իրենք պահանջում ենք անհապաղ ստեղծել գազամատակարարման և գազի բաշխման քննիչ հանձնաժողով: ՀՀԿ-ական պատգամավոր Մարգարիտ Եսայանն էլ ի պատասխան նրանց հայտարարեց. «Այդ մարդկանց հանդիպել եմ նաև ես, առաջարկել եմ իրենց բողոքները գրավոր ներկայացնել, որպեսզի ես և մեր խմբակցությունը կարողանանք գտնել խնդրի ելքերը: Այդ ժամանակ ԱԺ-ում քննարկվում էր բյուջեն, և ներկա էր նաև ՊԵԿ ղեկավարը, որին մոտեցել եմ և ներկայացրել եմ խնդրիը, ու պարոն Հարությունյանը լրագրողների հետ հանդիպման ժամանակ անմիջապես պատասխանել է բոլոր այն հարցերին, որ հնչեցրել էին ՓՄՁ-ների ներկայացուցիչները: Կարծում եմ՝ մենք այստեղ պատրաստ ենք ցանկացած խնդիր քննարկել, բայց անլուրջ կլինի քննարկել ուռճացված, շոու դարձված որևէ խնդիր»:
Հետևեք մեզ Viber-ում
