Fitch-ը Ադրբեջանում ՀՆԱ-ի անկում է կանխատեսում

Միջազգային վարկանշային Fitch գործակալությունը Ադրբեջանում 2016 թվականին ՀՆԱ-ի 3,3 տոկոս մակարդակի անկում է կանխատեսում:

«Ադրբեջանի իրական ՀՆԱ-ն 2016 թվականին 3,3 տոկոսով կկրճատվի: Ոչ նավթային հատվածը կկրճատվի 4 տոկոսով, քանի որ ադրբեջանական կառավարությունը սահմանափակում է ծախսերը, բանկային վարկավորումը մոտ է դադարեցվելուն, իսկ սպառողների վստահությունն ու գնողունակությունն ընկնում  են: Այդքանով հանդերձ, ծախսերի անկման մեծ մասը պետք է փակվի ներկրման կրճատման հաշվին», -նշում է գործակալությունը:

Fitch-ը գտնում է, որ Ադրբեջանում նավթի արդյունահանումը կպահպանի կրճատման նկատմամբ միտումը: Fitch-ի գնահատականներով` Ադրբեջանում միջին տարեկան արժեզրկումը 2016 թվականին կարագանա մինչեւ 14 տոկոս` 2015 թվականին եղած 4 տոկոսի դիմաց: Ավելի վաղ նշվել է, որ, Standart & Poor`s վարկանիշային գործակալության կանխատեսումներով, Ադրբեջանում 2016 թվականին ՀՆԱ-ի անկումը կկազմի 1 տոկոս, Իսկ Moody`s վարկանիշային գործակալությունն անկումը կանխատեսում է 0,7 տոկոս: Ադրբեջանի կառավարությունը 2016 թվականի ՀՆԱ-ի 1,8 տոկոս աճ է կանխատեսում: 2016 թվականի հունվարին Ադրբեջանում տնտեսական անկումը կազմել է 3,3 տոկոս: 2015 թվականին ՀՆԱ-ի աճը կազմել էր 1,1 տոկոս: Միջազգային Fitch Ratings եւ Standart & Poor`s վարկանիշային գործակալությունները Ադրբեջանի երկարաժամկետ վարկանիշը արտասահմանյան եւ ազգային արտարժույթներով «BBB-» մակարդակից իջեցրել են մինչեւ «աղբային»` «BB+» մակարդակի: