Նոր սադրանք Ռուսաստանի համար

«Ջաբհաթ  ան Նուսրա» ահաբեկչական խմբավորումը ցանկանում է Ռուսաստանին սադրել խախտել հրադադարի ռեժիմը։ Այս մասին Die Welt թերթի հոդվածագրին ասել է խմբավորման գրոհայիններից մեկը, որի հետ լրագրողի հանդիպումը տեղի է ունեցել Թուրքիայի սրճարաններից մեկում, փոխանցում է «ՌԻԱ Նովոստի»-ն։ Գրոհայինը, որը ներկայացել է Աբու Մուսսաբ ալ Սիրի, կարծում է, որ փետրվարի 27-ին Ռուսաստանի եւ ԱՄՆ-ի ջանքերով Սիրիայում կնքած զինադադարը հիմարություն է։ Նշենք, որ զինադադարի մասին համաձայնագիրը չի վերաբերում «Ջաբհաթ  ան Նուսրա» եւ «Իսլամական պետություն» խմբավորումներին. նրանց դիրքերի ռմբակոծումը շարունակվելու է։ Գրոհայինը կարծում է, որ 10 հազար հոգուց բաղկացած խմբավորումը Սիրիայում իրական ուժ ունի, եւ այն ուզում է վերջ դնել հրադադարի ռեժիմին։ «Ջաբհաթ  ան Նուսրա»-ն ցանկանում է դիտավորյալ ձախողել հրադադարի ռեժիմը, գրում է Die Welt-ը։ Թերթի հաղորդմամբ Սիրիայի հյուսիսում ծայրահեղականները պայքարում են կառավարական զորքերի դեմ «չափավոր ապստամբների» խմբավորումների միության հետ։ «Ջաբհաթ  ան Նուսրա»-ն մտադիր է հարձակումներով սադրել Ռուսաստանի Զինված ուժերին, որպեսզի վերջիններս պատասխան հարված հասցնեն։ Այդ ժամանակ կրակագծում ակամա կհայտնվեն նաեւ ավելի «չափավոր» խմբավորումները, որոնք կռվում են ծայրահեղականների կողմից։  Հենց որ նրանք հարվածի տակ հայտնվեն, հրադադարի ռեժիմը կխախտվի։ Աբու Մուսսաբը կարծում է, որ Սիրիայում քաղաքացիական պատերազմը կավարտվի միայն այն ժամանակ, երբ Ասադը տապալվի։