Մակրոնը նամակ է հղել Արամ Ա-ին եւ խոսել Արցախյան հիմնախնդրից ու Հայոց ցեղասպանությունից

Ֆրանսիայի նախագահ Էմանուել Մակրոնը նամակ է հղել Մեծի Տանն Կիլիկիո Արամ Ա կաթողիկոսին: Մակրոնն առաջին հերթին վստահեցրել է, որ Ֆրանսիան միջազգային իր դաշնակիցների հետ շարունակելու է աշխատել խաղաղության եւ ապահովության համար, հատկապես` Միջին Արեւելքում՝ պահպանելով ազգային եւ կրոնական զանազանությունն ու ինքնությունը, որը շրջանի յուրահատուկ հատկանիշներից է, գրում է yerkir.am-ը Նա նաեւ նշել է, որ Ֆրանսիան շարունակելու է պայքարել ծայրահեղության դեմ՝ պաշտպանելով ազգային եւ կրոնական ծայրահեղության ու բռնության զոհ դարձած համայնքներին: Անդրադառնալով  Սիրիայի ճգնաժամին՝ Մակրոնը շեշտել է արդարության վրա հիմնված` ճգնաժամի քաղաքական լուծման կարեւորությունը, որպեսզի Սիրիայի ժողովուրդը` բոլոր համայքները, կարողանան ապրել խաղաղության մեջ՝ հարգված տեսնելով իրենց մարդկային իրավունքները: Ֆրանսիայի նախագահը նաեւ անդրադարձել է Հայոց ցեղասպանությանը: Նշելով, որ Հայոց ցեղասպանությունից 100 տարի անց Միջին Արեւելքը դեռեւս ապրում է բռնության եւ բռնակալության մթնոլորտում՝ Մակրոնը վստահեցրել է, որ Ֆրանսիան հավատարիմ է իր դիրքորոշմանը եւ շարունակելու է շեշտել ճշմարտության ու հավաքական հիշողության պահպանման կարեւորությունը աշխարհի բոլոր երկրներում, այդ թվում՝ Թուրքիայում: Մակրոնը միաժամանակ ընդգծել է, որ «Ֆրանսիան անկեղծ բարեկամ է Հայաստանի եւ ամբողջ աշխարհում ապրող հայերի համար»: Ֆրանսիայի նախագահը շեշտել է, որ «Ֆրանսիան լիովին հանձնառու է Արցախի խնդրով բանակցություններում մնայուն լուծում գտնելու հարցին՝ հօգուտ շրջանի բոլոր ժողովուրդների»: Նամակի ավարտին Մակրոնը վերահաստատել է Ֆրանսիայի եւ Լիբանանի միջեւ գոյություն ունեցող հզոր բարեկամությունը՝ Լիբանանը որակելով գոյակցության, բազմազանության եւ ժողովրդավարության օրինակելի երկիր, ուր հայ համայնքն ունի իր կարեւոր դերը: