Դեռ քանի տարի է պետք. նախարարը հստակեցնում է
Այսօր խորհրդարանում Աշխատանքի և սոցիալական հարցերի նախարար Արտեմ Ասատրյանը լրագրողների հետ զրույցում նշեց, որ իրենց հիմնական նպատակը, որը դրված է հաջորդ տարվա բյուջեի նախագծում և կառավարության գործունեության ծրագրում, քաղաքացիների կյանքը բարելավելն է, որին, ըստ նախարարի հասնելու են: Լրագրողներից մեկի դիտարկմանը, որ հունվարից գնաճի նոր ալիք է սպասվում Հայաստանում, իսկ այդ ֆոնին աշխատավարձերի, թոշակների ու նպաստների բարձրացում չի նախատեսվում, այդ դեպքում ի՞նչ է սպասվում Հայաստանի բնակչությանը, Արտեմ Ասատրյանը պատասխանեց. «Ես ձեր տեղեկատվությունը, թե ինչի վրա է կառուցված, այս պահին չեմ կիսի: Կան հիմնական մոտեցումները, որոնք արտացոլված են բյուջեի նախագծում: Մեր հիմնական խնդիրը սոցիալական պաշտպանության ոլորտի շարունակականության ապահովումն է: Ցանկությունները շատ են, որ ոլորտի ծրագրերի հատկացումներն ավելացվեն, հատկապես խոցելի խմբերի համար նախատեսված գումարներն ավելացվեն, բայց, ցավոք սրտի, այսօրվա հնարավորություններն այն են, ինչ ներկայացված են հաջորդ տարվա պետական բյուջեի նախագծում»: Նախարարն ասաց, որ 2018 թվականի բյուջեն ուղղված է քաղաքացիների համար սոցիալական պաշտպանության ծրագրերի շարունակականության ապահովմանը և նաև կապիտալ ներդրումներին, ինչը կարևոր է այդ խնդիրների լուծման համար: Հարցին, թե այդ պարագայում, երբ է հնարավոր բարելավել ՀՀ քաղաքացիների սոցիալական վիճակը, նախարարը նշեց, որ դա շարունակական աշխատանք է, և իրենց նպատակն էլ քաղաքացիների սոցիալական վիճակը բարելավվելն է, սակայն հստակ ժամանակ չի կարող նշել:
Հետևեք մեզ Viber-ում
