2008 թ. ապրիլից քաղաքականությամբ չեմ զբաղվել, 2018թ.քաղաքականությունն սկսեց զբաղվել ինձանով. ՀՀ երկրորդ նախագահ

Ես 2008թ․-ից հետո չեմ զբաղվել քաղաքականությամբ, քաղաքականությունն է սկսել զբաղվել ինձնով։ Եղել եմ և՛ վարչապետ, և՛ նախագահ, և այդ պաշտոններն այն քաղցրությունը չունեն, որ չտես մարդիկ կարող են կպնել դրանց, որպես կյանքի վերջին երազանք։ Այս մասին լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանը։

«Ես չեմ զբաղվել քաղաքականությամբ, բայց երկիրն այնպիսի արհավիրքների տակ է հայտնվել, որ ինձ ստիպել է վերադառնալ քաղաքականություն։ Մինչև այս սպառնալիքները չվերանան, իմ իրավունքն է զբաղվել քաղաքականությամբ»,-ասաց նա։

Անդրադառնալով Հակակոռուպցիոն դատարանում վերաբացված գործին՝ երկորրդ նախագահն ասաց. «Ամեն ինչ բաց է լինելու։ Չկա մեղադրանք, տեսել եք՝ ես որտեղ եմ նստած եղել այս դատական նիստին։ Իմ տպավորությամբ՝ այս գործն այս վիճակում ուղղակի գցել են դատարանի գրպանը՝ լուծում գտնելու համար, իսկ օրինական լուծում այս վիճակից ուղղակի չկա։ Ես չգիտեմ՝ դատավորն ինչպես կտանի դատավարությունը, եկեք սպասենք, չեմ կարող դատավորի անունից խոսել։ Եթե ունենա համարձակություն, ապա պետք է ուղղակի կարճի այս գործը»։