Մոսկվայի ռազմական բիզնեսի գրավչությունը
«Մոսկվան չի թաքցնում Երևանի հետ ռազմատեխնիկական համագործակցությունը և Բաքվին կոչ է անում ըմբռնումով մոտենալ», երեկ հայտարարել է Ռուսաստանի արտաքին գործերի նախարարության մամուլի խոսնակ Մարիա Զախարովան: «Մենք դիվանագիտական խողովակներով ադրբեջանական կողմին արդեն տեղեկացրել ենք այդ մասին»,- ասել է նա՝ նշելով, որ Ռուսաստանը Հայաստանի հետ կապված է միութենական հարաբերություններով և զարգացնում է նաև ռազմատեխնիկական համագործակցությունը: Նրա խոսքերով՝ սպառազինություն մատակարարելիս Մոսկվան հաշվի է առնում տարածաշրջանի բոլոր ռիսկերը. «Ռազմական ցանկացած մատակարարումներ ինչպես Հայաստանին, այնպես էլ բարեկամ Ադրբեջանին, մեր կողմից իրականացվում են՝ ուշադրությամբ հաշվի առնելով տարածաշրջանում ուժերի հավասարակշռությունը պահպանելու անհրաժեշտությունը»,- այսօր հայտարարել է Ռուսաստանի արտգործնախարարության պաշտոնական ներկայացուցիչը: Զախարովան հավելել է, որ Ռուսաստանը զենքի մատակարարումների հարցում անփոփոխ պահպանում է ստանձնած միջազգային պարտավորությունները, գործում է արտահանման վերահսկման ազգային համակարգի կոշտ շրջանակներում։ Ինչպես հայտնի է, Հայաստանին մատակարարված 200 միլիոն դոլարի սպառազինությունների հարցով՝ պաշտոնական Բաքուն Ռուսաստանի ԱԳՆ-ին բողոքի նոտա էր հղել: Ադրբեջանի ԱԳՆ ներկայացուցիչ Հիքմեթ Գաջիևը` մեկնաբանելով զենքի ու ռազմական տեխնիկայի գնման համար Հայաստանին Ռուսաստանի կողմից տրամադրված 200 միլիոն դոլարի վարկի համաձայնագիրը, Գաջիևն ասել է, թե Ադրբեջանի ԱԳՆ-ն դրա հետ կապված արդեն բողոքի նոտա է հղել ՌԴ ԱԳՆ-ին: Նոտայում ասվում էր, որ Ադրբեջանը բազմիցս հայտարարել է, որ Հայաստանի կողմից ձեռք բերված սպառազինություններն ու ռազմական տեխնիկան տեղակայվում են Ադրբեջանի «օկուպացված տարածքներում»`Լեռնային Ղարաբաղում: «Օկուպացված տարածքներում» առանց արտահանող երկրի թույլտվության տեղակայելով սպառազինությունները՝ Հայաստանն այդկերպ կոպտորեն խախտում է իր ստանձնած միջազգային պարտավորությունները, ինչպես նաև սպառազինության վրա թափանցիկությունն ու վերահսկողությունը, հայտարարել է Գաջիևը: Նրա խոսքով՝ Ադրբեջանը պահանջում է արտահանող երկրից, այն է՝ Ռուսաստանից, երաշխիքների ստացում, որ վաճառված սպառազինությունն ու ռազմական տեխնիկան չեն տեղակայվի «ադրբեջանական տարածքներում ու հայ-ադրբեջանական սահմանի երկայնքով»: Երեկ Ռուսաստանի նախագահ Վլադիմիր Պուտինը Ադրբեջանի նախագահ Իլհամ Ալիևի հետ հեռախոսազրույց է ունեցել, որի ընթացքում քննարկել է առևտրատնտեսական համագործակցության և միջազգային օրակարգի մի շարք հրատապ թեմաներ, հայտնում էր Կրեմլի մամուլի ծառայությունը: «Նախագահները կարծիքներ են փոխանակել Սիրիայի իրադրության կարգավորման հարցերի շուրջ՝ ընդգծելով Սիրիայում մարտական գործողությունների դադարեցման վերաբերյալ Ռուսաստանի և ԱՄՆ-ի համատեղ հայտարարության իրագործման կարևորությունը»,- նշվում է հաղորդագրության մեջ: Պայմանավորվածություն է ձեռք բերվել շարունակել շփումները: Հեռախոսազրույցից այլ մանրամասներ չէին փոխանցվում: Իրականում, Ռուսաստանը «և-և»-ի քաղաքականություն է վարում Հայաստանի և Ադրբեջանի հետ: Պարզապես, երբ տեղեկություն է ստացվում Հայաստանի հետ Ռուսաստանի կնքած ռազմական նոր պայմանագրերի ու մատակարարված զենքի մասին` աղմկում են Բաքվից: Երբ` Ադրբեջանի հետ է Ռուսաստանը կնքում նման համաձայնագրեր` Հայաստանից է աղմուկն ուժեղանում: Սա Մոսկվայի բիզնեսն է, անշուշտ քաղաքական ենթատեքստով` Հայաստանի և Ադրբեջանի նկատմամբ վերահսկողությունն ու ազդեցությունը պահպանելու նպատակով, որից Ռուսաստանն օգտվում է մեծ հաճույքով, մյուս կողմից ներգրավված լինելով որպես միջնորդ` ԵԱՀԿ Մինսկի խմբում և կոչված լինելով` աջակցել կողմերին ղարաբաղյան հակամարտության խաղաղ կարգավորմանը հասնելու համար: Թամար Բագրատունի
Հետևեք մեզ Viber-ում
