Ավազակային հարձակում 37-ամյա իրավաբանի նկատմամբ.հափշտակվել է դրամապանակը և բանկոմատի քարտերը

Երեկ՝ նոյեմբերի 2-ին, ավազակային հարձակում է տեղի ունեցել Երևանում։ Ժամը 21։30-ի սահմաններում անհայտ անձը Կենտրոն վարչական շրջանի Սարյան փողոցի 40 շենքի վերելակում դանակի սպառնալիքով ավազակային հարձակում է կատարել նույն շենքի բնակիչ՝ 37-ամյա Ինգա Բաղդասարյանի նկատմամբ։ Ինչպես հայտնում է ֆոտոլրագրող Գագիկ Շամշյանը, տականքը կնոջից դանակի սպառնալիքի տակ հափշտակել է դրամապանակը, որի մեջ եղել է 60 հազար դրամ, բանկոմատի քարտեր և 1000 ՌԴ ռուբլի, այնուհետև դիմել է փախուստի։ Նշված հասցե են ժամանել Ոստիկանության Երևան քաղաքի վարչության օպերատիվ խումբը՝ քրեական հետախուզության բաժնի պետ Գարիկ Ղուկասյանի, Ոստիկանության Կենտրոնական բաժնի օպերատիվ խումբը՝ բաժնի պետ Արամ Հովհաննիսյանի գլխավորությամբ։ Փաստի առթիվ Հայաստանի քննչական կոմիտեի Երևան քաղաքի քննչական վարչության Կենտրոն և Նորք Մարաշ վարչական շրջանների քննչական բաժնում քննիչ Նահապետյանի կողմից հարուցվել է քրեական գործ։ Ոստիկանությունն ու քննչական բաժինը ձեռնարկում են անհրաժեշտ օպերատիվ-հետախուզական և քննչական համատեղ գործողություններ՝ հանցագործությունը բացահայտելու ուղղությամբ։ Գ. Շամշյանի տեղեկություններով՝ Ի. Բաղդասարյանը մասնագիտությամբ իրավաբան է։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: