«Աքլորականչը»՝ սպասվածից շուտ
Արդյոք սպասվածից շուտ եղա՞վ «մինչեւ աքլորականչը» ու իշխանության գիրկը նետված ՀՅԴ-ն ուրացավ Հանրապետականին՝ հղելով Ռոբերտ Քոչարյանի հնարավոր վերադարձի իր ողջույնը, թե՞ դաշնակցությունը Սարգսյան-Քոչարյան դիմակայության հարթման մեկնարկն է տալիս, ցույց կտա ժամանակը: ՀՅԴ խմբակցության ղեկավար Արմեն Ռուստամյանը ԱԺ ավանդական ճեպազրույցների ժամին այսօր հայտարարել է, որ եթե ՀՀ նախկին նախագահ Ռոբերտ Քոչարյանը որոշի աշխուժացնել իր մասնակցությունը քաղաքական կյանքին, ՀՅԴ-ն միայն կողջունի այդ որոշումը: Նրա խոսքով, իր կուսակցությունը մինչեւ հիմա լավ հարաբերություններ է պահպանում Ռոբերտ Քոչարյանի հետ ու «անհեթեթություն» են այն կարծիքները, թե ՀՅԴ-ն միավորվել է ՀՀ իշխող Հանրապետական կուսակցության հետ, որպեսզի փակի Քոչարյանի ճանապարհը: «Մենք արդեն 25 տարի է կողմ ենք արտահայտվում 7 նպատակների իրականացմանը, որոնք կարեւորագույնն ենք համարում մեր երկրի համար: Մենք համագործակցել ենք իշխանությունների հետ նաեւ Քոչարյանի օրոք: Կարծում եմ, որ նրա կառավարման տարիները դրական են եղել մեր երկրի համար»,- ասել է Ռուստամյանը: Ինչպես ասում են՝ դաշնակցությունը գերազանցում է իրեն ու հաջողությամբ տանում «յոթը դռան» հայտնի կենդանի լինելու որդեգրած սկզբունքը: Ընդամենը ամիսներ առաջ, երբ տենչալով տենչում էր բռնել կերակրատաշտին տանող ճանապարհը, քոչարյանական երբեմնի հենարան ՀՅԴ-ից այնպես էին շշպռում նախկին «բոսին» ու հակադարձում սահմանադրական փոփոխությունների դեմ Քոչարյանի հարցազրույցներին, որ առաջին հայացքից անհավատալի էր թվում, թե ինչպես կարող են քար նետել մի ուղղությամբ, որ իրենց երկրորդ կյանք է պարգեւել: Հիմա, երբ ջրերը հանդարտվել են, ՀՅԴ-ում ողջույնններ ու բարեւներ են փոխանցում երբեմնի մեկենասին՝ տպավորություն ստեղծելով, որ ՀՅԴ-ն կփորձի նախորդ երեք կոալիցիաների համար վարձահատույց լինել Ռոբերտ Քոչարյանին եւ նրան առաջարկել քաղաքական գործակցություն, այդպիսով դառնալով Հայաստանի ներիշխանական համակարգում վերջին ութ տարիների առանցքային ՝ Սարգսյան-Քոչարյան դիմակայության հարթման միջնորդները: Ի դեպ, պարզվում է ՀՅԴ-ականները ոչ միայն պրոֆեսիոնալ միջնորդներ են՝ սրանից նրան խոսք տանել-բերելու հմուտ վարպետներ, այլեւ անեկդոտներ պատմելու հատուկ շնորհ ունեն: ՀՅԴ խմբակցության ղեկավար Արմեն Ռուստամյանը այսօր հայտարարել է, թե իրենցից հետո Հայաստանում, միջազգային կառույցների չափորփոշիչներով, քաղբանտարկյալներ չեն եղել:Նա սխալ է համարում քաղաքական դրդապատճառներով գնահատելը քաղաքացիական ակտիվիստ Վարդգես Գասպարիի կալնավորման դեպքը, եւ կարծում է, որ պետք է քաղաքական բանտարկյալի գնահատականը տալ միջազգային կառույցների չափորոշիչների հիման վրա: «Եվրոպայի խորհուրդ կա, որ զբաղվում է այդ ամեն ինչով: Եթե այդպես լինի, միանգամից մոնիտորինգի հանձնաժողովը դրան կարձագանքի, զեկույցները կարձագանքեն եւ համապատասխան մարմիններն անաչառ գնահատականը կտան, ոչ թե ով, երբ ուզենա իր նախասիրություններից, իր քաղաքական ենթատեքստերից ելնելով որոշի՝ ով ինչ բանտարկյալ է»: Իսկ 90-ականներին, երբ բանտարկված էին ՀՅԴ-ական գործիչների, միջազգային կառույցնե՞րն են գնահատել, որ նրանք քաղբանտարկյալներ են հարցին, Արմեն Ռուստամյանը պատասխանեց. «Այն ժամանակ չկային այն չափորոշիչները, որ հիմա գործում են: Ավելին ասեմ, այն ժամանակ երբ մենք բանտերում էինք, Հայաստանը Եվրոպայի խորհրդի անդամ էլ չէր եւ երեւի դա էր սանձազերծել իշխանություններին, որ ինչ ուզենան անեն: Բավական են մի քանի փաստեր, առնվազն իրենց հայտարարությունները որ կատարվել են: Այսօրվա գնահատականները եթե վերցնենք եւ անցյալ փաստերը համդրենք՝ միանշանակ քաղբանտարկյալներ են: Բա քաղբանտարկյալը ո՞նց է լինում»: Մեկը լիներ հարցնել՝ «Իյա….իրոք»… Անի Սահակյան
Հետևեք մեզ Viber-ում
