Նիկոլն իշխանության կասկածների շրջապտույտում
Հանրապետական խմբակցության ղեկավար Վահրամ Բաղդասարյանը ուշագրավ հայտարարություն է արել: Խոսելով այն մասին, որ ՀՀԿ-ն կուլիսային շփումներ ու համագործակցություն է ծավալում տարբեր քաղաքական ուժերի և անհատների հետ ու շեշտելով, որ այսուհետ այդ համագործակցությունը պետք է բացահայտ լինի՝ նկատի ունենալով, որ երկիրն անցում է կատարել պառլամենտական համակարգին ու մեծացել է խորհրդարանի դերը, պատգամավորներինը՝ հատկապես, ասել է. « Օրինակ, ՄԻ պաշտպանը ՀՀԿ-ի թեկնածուն էր, հավաքեց 96 ձայն, հիմա եղե՞լ է համագործակցություն, թե՞ չի եղել: Իսկ հիմա մենք բացահայտ համագործակցություն ենք հայտարարել: Խորհրդարանական համակարգի ժամանակ մենք պետք է համագործակցենք և՛ ընդդիմադիր քաղաքական ուժերի հետ, և՛ համագործակցող ուժերի հետ: Տարբեր ֆորմատներով մենք պետք համագործակցենք բոլոր քաղաքական ուժերի հետ, և ոչ միայն՝ պառլամենտական, նաև արտախորհրդարանական քաղաքական, քաղաքացիական հասարակության հետ»: Հարցին՝ ուզում եք ասել՝ Նիկոլ Փաշինյանի հետ է՞լ եք դուք համագործակցում, Վ. Բաղդասարյանն այսպես պատասխանեց. «Եղել են դեպքեր, որ օրենքների հետ կապված մենք համագործակցել են նաև Նիկոլ Փաշինյանի հետ, ինչո՞ւ պետք է Նիկոլ Փաշինյանի նման բանիմաց քաղաքական գործչի հետ ես բանակցություն չվարեմ, կամ Զարուհի Փոստանջյանի, կամ մյուսների հետ»: Բաղդասարյանի հայտարարությունը հետաքրքրական է դառնում Փաշինյան-իշխանություն համագործակցության վերաբերյալ օրեր առաջ պատգամավորի հասցեին ուղղված մեղադրական ակնարկներից հետո: Բոլորն են հիշում, թե ինչպես պատգամավոր Նիկոլ Փաշինյանին մեղադրեցին իշխանությունների հետ գաղտնի համագործակցության համար և ինչպես էր Փաշինյանը կաշվից դուրս գալիս հակառակն ապացուցելու համար: Շաբաթներ առաջ խորհրդարանում, մասնավորապես, երկխոսություն ծավալվեց կառավարության աշխատակազմի ղեկավար Դավիթ Հարությունյանի ու Փաշինյանի միջեւ: Հովիկ Աբրահամյանին ուղղված ավանդական <<օդում կախված>> լուրերի մասին հարցին պատասխանելով՝ Հարությունյանը հեգնեց Փաշինյանին՝ ասելով, թե նա կարիք չունի ապացուցելու, որ ինքը իսկական ընդդիմադիր է։ «Գոնե ինձ հասկանալի է, թե ինչպես եք Դուք ուզում հերքել այն հայտարարությունները, թե Դուք ինչ-որ կերպ կապ ունեք իշխանության հետ, որ դուք իսկական ընդդիմադիր եք և այլն։ Եթե նպատակը դա է, ապա կարիք չկա։ Առնվազն ինձ Դուք արդեն համոզել եք, որ իշխանության հետ կապ չունեք։ Լրացուցիչ ջանքեր պետք չեն»,- ասաց Հարությունյանը՝ տողատակերում իշխանության հետ համագործակցության կասկածների մասին հայտնելով: Այդ հայտարարությունից շատ չանցած ՀՀԿ խմբակցության ղեկավարը, փաստորեն, առանց այս ու այն կողմ ընկնելու հայտարարեց, որ Փաշինյանի հետ համագործակցություն, իսկապես, կա: Վերջինը դեռեւս չի արձագանքել ՀՀԿ խմբակցության ղեկավարի հայտարարությանը, եւ քանի դեռ <<օդում կախված>> են համագործակցության մասին լուրերը, ապա կարելի է մի քանի եզրահանգում անել՝ առաջին՝ համագործակցության իրողությունն անհերքելի է, ինչով էլ պայմանավորված էր Դավիթ Հարությունյանի նուրբ ակնարկները՝ հեռահար ուղերձով, որ եթե պատգամավորը համագործակցում է իշխանության որեւէ թեւի հետ, ապա անընդունելի է մեկ ուրիշ թեւի դեմ պայքարը: Երկրորդ՝ գաղտնիք չէ, որ քաղաքական դաշտի ամայացումից հետո Փաշինյանն այն եզակի գործիչներից է, որ դեռեւս չի կորցրել հանրային վարկանիշը, եթե չասենք, որ գնալով այն ավելի է մեծանում, ինչն էլ անհանգստություն է պատճառում իշխանությանն ընդհանրապես, որը փորձում է նմանատիպ հայտարարություններով կասկած սերմանել հանրության շրջանում: Այսուհանդերձ, Վահրամ Բաղդասարյանի խոսքերում ճշմարտության հատիկ կա այն առումով, որ Փաշինյանն իր վստահության քվեն տվեց ՄԻ թեկնածու Արման Թաթոյանին: Փաշինյանը հայտարարեց, որ ինքը կողմ կքվեարկի ՀՀԿ-ի առաջարկած թեկնածու Արման Թաթոյանին՝ իր որոշումը մեկնաբանելով որպես պոստ ֆակտում` վստահության քվե, Հայաստանում մարդու իրավունքների պաշտպանության ինստիտուտին: Վստահությունը վստահություն, բայց գլխավոր հարցը մնում է օդում կախված`ինչո՞ւ Փաշինյանը վստահեց իշխանության թեկնածուին, այն իշխանության, որի նկատմամբ Փաշինյանը բացարձակ վստահություն չունի ու այդ մասին մշտապես հայտարարում է հենց ինքը: Անկախ ինստիտուտի նկատմամբ դրսեւորած հարգանքից, Փաշինյանն իբրեւ նախկին քաղբանտարկյալ, չպետք է իր քվեն տար մի թեկնածուի, որը ոչ մի կերպ չխոսեց Հայաստանում քաղբանտարկյալների առկայության եւ այն մասին, թե մեր երկիրն, ընդհանրապես, ունեցել է քաղբանտարկյալներ, թե ոչ: ` Անի Սահակյան
Հետևեք մեզ Viber-ում
