Նոր բնակարաններ կառավարությունից

Կառավարությունը շարունակում է պետական ծրագրերի շրջանակում նոր բնակարանների կառուցման ծրագիրը, որը նախատեսված է պետական համակարգում աշխատողների համար: Երևանի Արաբկիր վարչական շրջանում՝ Ադոնց փողոցում կառուցվող բնակարանային համալիրի հարևանությամբ՝ Ադոնց N 6/2 հասցեում, նախատեսվում է սկսել նոր շենքի շինարարություն: Նոր շենքի շինարարությունը նախատեսվում է ավարտել և շահագործման հանձնել 2018 թվականի դեկտեմբերին: Կառավարության փետրվարի 25-ի նիստում կհաստատվի պետական ծառայողներին մատչելի բնակարաններով ապահովման ծրագրի շրջանակում Երևան քաղաքի Ադոնց փողոցի N 6/2 հասցեում կառուցվող բազմաբնակարան շենքային համալիրից բնակարանների վաճառքի կարգը: Ըստ այդմ՝ բնակարանների համար 1 քմ-ի արժեքը սահմանվում է 310 հազար դրամ՝ ներքին հարդարմամբ և 285,000  դրամ՝  առանց ներքին հարդարման, ավտոկայանատեղի արժեքը՝  1մլն 950 հազ.  դրամ: Նորակառույց շենքն ունենալու է 170 բնակարան՝ 2, 3 և 4-սենյականոց: Պետական ծառայողները բնակարանները կարող են ձեռք բերել փուլային վճարման եղանակով, ինչպես նաև հիփոթեքային վարկավորմամբ՝ վճարելով կանխավճար՝ բնակարանի արժեքի 7,5 տոկոսը: Պետծառայողները հիփոթեքային վարկով բնակարան գնելու դեպքում օգտվում են նաև վարկի տոկոսները եկամտահարկով հատուցելու հնարավորությունից: Բնակարանը՝ հարկով, մուտքով ու դիրքով, ընտրում են շահառուները՝ վիճակահանության սկզբունքով: Շենքերն ունեն նաև ավտոկայանատեղի: «ՀՀ-ում պետական ծառայություն իրականացնող անձանց մի մասը բնակարանների ներկայիս ձևավորված շուկայական գների պայմաններում հնարավորություն չունի ինքնուրույն լուծելու իր ընտանիքի բնակարանային խնդիրները: Այդ կապակցությամբ կառավարությունը դեռևս 2014 թվականին ձեռնարկել է միջնորդային ծրագիր, որի շրջանակներում նախատեսված էր Արաբկիր վարչական շրջանի Ադոնց փողոցի N 6/1 հասցեում կառուցել բազմաբնակարան շենքային համալիր: Ծրագրի գոհացուցիչ արդյունքներից ելնելով, որոնց մասին հավաստել են շահառուները, կատարվել է մոնիթորինգ, որի արդյունքում պարզվել է, որ շուրջ 700 պետական ծառայող շահագրգռված են օգտվել բնակարանների և ավտոկայանատեղերի վաճառքի ծրագրից»,- նշված է նախագծի հիմնավորման մեջ: Նախագծի հեղինակները համոզված են, որ բնակարանները  շուկայականից մատչելի տարբերակով  են առաջարկվում պետծառայողներին: Սակայն եթե համեմատելու լինենք անշարժ գույքի այժմյան շուկայկան գները, ամենևին էլ էժան չեն գները: Միակ առավելությունը թերևս կանխավճարի ցածր շեմն է, քանի որ, որպես կանոն, բանկերը հիփոթեքային վարկ հատկացնելու համար 20-30 տոկոս կանխավճար են պահանջում: Եվ երկրորդ առավելությունը եկամտահարկի արտոնությունն է, որը սակայն, կառուցապատողից բնակարան ձեռք բերելու պարագայում տարածվում  է բոլոր նորակառույցների  վրա: Ամեն դեպքում, ծրագրի գինը ավելի շատ կոմերցիոն է, քան թե սոցիալական: Ըստ էության, կառավարությունը այս կերպ փորձում է լուծել տնտեսական աճի և շինարարության ոլորտի զարգացման խնդիրը: Հավելենք նաև, որ սա պետծառայողների համար նախատեսված երկրորդ նորակառույցը կլինի. առաջինը՝ Ադոնց փողոցի N 6/1 հասցեում կառուցվող շենքը, որը նախատեսված է 330 պետծառայողի համար, կշահագործվի 2017 թվականին: Բացի այս՝ նորակառույց բնակարանների ծրագիր իրագործում է նաև ԵՊՀ շրջանավարտների միավորումը: Մասնավորապես <<Մատչելի ծրագիր երիտասարդ մասնագետներին>> ծրագրի շրջանակում վերջին մի քանի տարում նոր շենքեր են կառուցվել Ավան և Քանաքեռ-Զեյթուն վարչական շրջաններում:   Դավիթ  Մանուկյան