Ծանր հանցագործության համար դատապարտվածը հավակնում է դառնալ Փորձաքննությունների ազգային բյուրոյի ղեկավար

Քրեակատարողական հիմնարկի վարչության նախկին պետ Սամվել Հովհաննիսյանը, ով երկարատեւ ազատազրկման է դատապարտվել՝ ծանր հանցագործություն կատարելու համար, պաշտոն ստանալու հավակնություններ ունի։ «Փաստինֆո»-ի տեղեկություններով՝ Սամվել Հովհաննիսյանը հայտ է ներկայացրել Փորձաքննությունների ազգային բյուրոյի ղեկավարի թափուր տեղի համար հայտարարված մրցույթին։Հիշեցնենք, որ այս պաշտոնը թափուր է մնացել Արտաշես Ջավադյանի հրաժարականից հետո, ով Բյուրոն ղեկավարել էր ձեւավորման պահից՝ 2004 թվականից:Արդեն ավելի քան երեք ամիս է, ինչ Բյուրոն չունի տնօրեն։ Հայտարարվել էր մրցույթ եւ հայտերի ընդունման ժամկետն ավարտվել է նախորդ շաբաթ։ Հայտ է ներկայացրել 5 անձ որոնց թվում է նաեւ Սամվել Հովհաննիսյանը։Հիշեցնենք, որ Երևանի Արաբկիր և Քանաքեռ-Զեյթուն վարչական շրջանների դատարանի՝ դատավոր Արմեն Խաչատրյանի նախագահությամբ, 2014թ. մայիսի 5-ի դատավճռով Սամվել Հովհաննիսյանին, ով 2001-2006 թթ. պաշտոնավարել է որպես ՀՀ արդարադատության նախարարության քրեակատարողական վարչության պետ, մեղավոր էր ճանաչել ՀՀ քրեական օրենսգրքի 38-35-104-րդ հոդվածի 2-րդ մասի 8-րդ կետով՝ շահադիտական դրդումներով, պատվերով սպանության նախապատրաստությունը կազմակերպելը, ինչպես նաև ՀՀ քրեական օրենսգրքի 178-րդ հոդվածի 3-րդ մասի 1-ին կետով՝ առանձնապես խոշոր չափերի խարդախություն, և ընդհանուր առմամբ դատապարտել 12 տարվա ազատազրկման: