Շոուի իմաստը պարզ է

Քաղաքագետ Սուրեն Սուրենյանցը գրել է.

Գուցե մի քիչ երկար ստացվի, բայց անպայման կարդացեք: Ըստ իս, կարևոր է:

Վճռաբեկ դատարանը բեկանել է Ռոբերտ Քոչարյանի, Յուրի Խաչատուրովի և մյուսների գործը կարճելու որոշումը․ գործը կրկին կքննվի՝ Հակակոռուպցիոն դատարանում:

Չորս նախկին բարձրաստիճան պաշտոնյաները 2018 թվականից մեղադրվում էին 2008 թվականի մարտի իրադարձությունների ժամանակ սահմանադրական կարգը տապալելու կամ դրան օժանդակելու մեջ։

Ես եղել եմ Մարտի 1-ի գործով նախկին քաղկալանավոր ու կարծիքս այդ իրադարձությունների մասին չի փոխվել. տեղի ունեցածի պատասխանատուն Ռոբերտ Քոչարյանն էր, ով այդպիսով ապահովում էր իշխանության տրանզիտը:

Իսկ ի՞նչ արեց Նիկոլ Փաշինյանը՝ իշխանության գալուց հետո:

Իր կողմից «ծյունինգի» ենթարկված ՍԴ-ի կողմից արդարացրեց Ռոբերտ Քոչարյանին՝ թաղելով Մարտի 1-ի բացահայտման հնարավորությունը:

Դա տեղի ունեցավ 2021-ի խորհրդարանական ընտրություններից առաջ և դարձավ այն ինֆորմացիոն առիթը, որը «մաքրված» Ռոբերտ Քոչարյանին դարձրեց ընդդիմության առաջնորդ:

Ի՞նչ է անում Նիկոլ Փաշինյանը հիմա:

Դարձյալ մոտենում են ընտրությունները և նրան նոր շոու է պետք:

Մարտի 1-ի բացահայտման մասին մոռացեք:

Ինչ հոդված էլ Քոչարյանի վրա դրվի, վաղեմության ժամկետի հիմքով նա չի ազատազրկվելու:

Շոուի իմաստը պարզ է:

Գուցե մի քանի ամիս Քոչարյանին տանեն- բերեն, մի թեթև «հալածեն», ծայրահեղ դեպքում՝ մի քանի ամիս «փակեն»: Սրա վերջում մենք երկու «ուղեգիր» կստանանք՝ Փաշինյանի և Քոչարյանի վերարտադրության, առաջինը՝ որպես իշխանության ղեկավար, երկրորդը՝ տիտղոսային ընդդիմության:

Փաշինյանը ժողովրդին «հավի» տեղ ա դրել, ժողովուրդն առնվազն պիտի ապացուցի, որ այդ թռչունից գոնե մի քիչ ավելի մտածելու կարողություն ունի: