Ջիգարխանյանը ձերբակալվել է կնոջ տուն մտնելու փորձի ժամանակ

Աղմկահարույց պատմության կիզակետում հայտնված դերասան Արմեն Ջիգարխանյանին բերման են ենթարկել իր կնոջ անունով ձեռքբերված Մոսկվայում գտնվող բնակարան մտնել փորձելու ժամանակ։ Նա ցանկացել է իր իրերը վերցնել բնակարանից։ Վիտալինա Ցիմբալյուկ-Ռոմանովսկայայի մտերիմ ընկերուհին dni.ru-ին հայտնել է, որ այդ բնակարանն Արմեն Ջիգարխանյանի կնոջ սեփականությունն է: «Դա Արմեն Բորիսովիչի կնոջ սեփականությունն է, Ջիգարխանյանն այդ բնակարանի նկատմամբ ոչ մի իրավունք չունի,- նշել է կնոջ ընկերուհին՝ հավելելով, որ դերասանը և ընկերը մտադիր են եղել բացել կողպեքները և կոտրել դուռը: «Բնականաբար, դեպքի վայր ժամանած ոստիկանության ջոկատը բռնել է դերասանին և բնակարանը հաջողվել է պաշտպանել ոտնձգությունից»,- հաղորդել է նա: Ավելի վաղ տեղեկացրել էինք, որ 82-ամյա դերասանի երիտասարդ կինը՝ իր մոր և հոր հետ, հոկտեմբերի 29-ի ուշ երեկոյան գաղտնի կերպով հեռացել է Ռուսաստանից։