Հրանտ Թոխատյանը սիրված թամադա է.«Երկիր ծիրանի»
Երեւանի ավագանու նախկին անդամ Հրանտ Թոխատյանի ստեղծած հիմնադրամին է անցնում Արաբկիր վարչական շրջանի «Կանազ» մշակույթի տան շենքի տնօրինումը.նման որոշում կայացվեց ավագանու այսօրվա նիստում: Դեմ քվեարկած «Երկիր ծիրանի» խմբակցության ավագանու անդամներից Մարինա Խաչատրյանն անդրադառնալով Հրանտ Թոխատյանի ստեղծած «Արվեստի այբբենարան» մշակութային հիմնադրամին 10 տարի ժամկետով անհատույց տնօրինման իրավունքով տրամադրվող շենքի հարցին՝ ասաց. «Այս հիմնադրամը շուրջ մեկ տարի գործում է: Մենք տեսնում ենք 0 դրամ նրա հաշվեհամարին»: «Մենք վստահ չենք, որ շենքում մշակութային գործունեություն կծավալվի: Շատ լավ գիտենք, որ Հրանտ Թոխատյանը հայտնի եւ սիրված թամադա է նրանց շրջապատում , սակայն Հրանտ Թոխատյանը նախկին 4 տարվա ընթացքում եղել է ավագանու անդամ եւ հենց նրա ավագանության օրոք, էլի լռելու համար էին մարդկանց բնակարաններ տրվում, ինքը շատ կողմ էր եւ ուրախ-ուրախ կողմ էր քվեարկում: Ավելի վատ բան՝ նրա ավագանի լինելու ժամանակաշրջանում է, որ պայթեցվել է նույն տպարանի շենքը, որը նույնպես մշակությային կոթող էր ներկայացնում: Ինչո՞ւ այն ժամանակ Հրանտ Թոխատյանը ձայն չի բարձրացրել եւ հիմա ուզում է մշակույթը բարձրացնել մոխիրների՞ց»,- հարց բարձրացրեց Մարինա Խաչատրյանը եւ հավելեց, որ Երեւան քաղաքը նման մարդկանց չեն վստահում: Հարցի վերաբերյալ ելույթով էր հանդես եկել ՀՀ ժողովրդական արտիստ Հրանտ Թոխատյանը: Հրանտ Թոխատյանի շահերը պաշտպանեց Երևանու ավագանու ՀՀԿ-ական անդամ Արա Երնջակյանը: «Էդ մարդը 60 տարեկան է դառնում, ո՞նց, միայն թամադա՞ է եղել, հետաքրքիր է, էդ ասողները ի՞նչ են արել էս երկրի համար», - ասաց նա: Հրանտ Թոխատյանին պաշտպանեց նաև Երևանի փոխքաղաքապետ Արամ Սուքիասյանը՝ հորդորելով գնահատականների մեջ լինել կոռեկտ ու շատ զգույշ: Արձագանքեց նաև քաղաքապետ Տարոն Մարգարյանը: «Պարոն Թոխատյան, մենք շատ ուրախ ենք, որ Դուք աշխատել եք մեր հետ ավագանիում, ու ուրախ ենք, որ Դուք ՀՀԿ անդամ եք, մենք վստահում ենք Ձեզ, ու ՀՀԿ-ն կողմ է քվեարկելու, իսկ էն մարդիկ, ովքեր փորձում են Ձեզ քննադատել… մի մռմռացեք», - ասաց Տարոն Մարգարյանը: Նշենք, որ հարցն ընդունվեց, իսկ քաղաքապետարանի ՀՀԿ-ական անդամները բուռն ծափողջույններով ընդունեցին այն:
Հետևեք մեզ Viber-ում
