«Ճվճըվ Արոյի 24-ամյա տղան կալանքից պրծավ». ով է միջամտել

Shamshyan.com-ը հայտնում է. Հայաստանի քննչական կոմիտեի Երևան քաղաքի քննչական վարչության Արաբկիրի քննչական բաժնի քննիչ Վահան Վարագյանի որոշմամբ որպես խափանման միջոց բնակության վայրից չհեռանալու ստորգրություն է վերցվել «Ճվճըվ Արոյի» 24-ամյա որդուց՝ Սերժ Վարդանյանից։ Վերջինս, ով նախկինում եղել է դատապարտված, կասկածվում է Երևանի Արաբկիր վարչական շրջանում կողոպուտ կատարելու մեջ, որից հետո դիմել էր փախուստի։ Ոստիկանության քրեական հետախուզության գլխավոր վարչության, Ոստիկանության կազմակերպված հանցավորության դեմ պայքարի գլխավոր վարչության, Ոստիկանության Արաբկիրի բաժնի ծառայողների ձեռնարկված օպերատիվ գործողությունների արդյունքում Ս. Վարդանյանը հայտնաբերվել էր և բացատրական աշխատանքների շնորհիվ մեղայականով ներկայացել էր Արաբկիրի Ոստիկանություն։ Արդեն Ոստիկանությունից նրան տեղափոխում են Արաբկիրի քննչական բաժին, որտեղից էլ քննիչի որոշմամբ ազատ է արձակվում։ Նրա ազատ արձակման գործում դերակատարություն է ունեցել պապը՝ Նիկոլայ Վազգենի Գաբրիելյանը, ով ավելի շատ հայտնի է «Վազգենիչ» և աշխատում է «Գազպրոմ Արմենիա» ընկերության «ՏրանսԳազ»-ի պետ, ու նրան ճանաչողներն ասում են, որ եթե պապը ամեն անգամ չհոռացներ Սերժ և Սարգիս Վարդանյաններին, ապա նրանք ամեն անգամ քրեական պատմությունների մեջ չէին հայտնվի և ջրից չոր դուրս չէին գա։ Էստեղ են ասում «պապն ամեն անգամ փլավ է ուտում»։ Հասարակությունն էլ, իմանալով, որ նշված անձինք, որոնց «շնորհիվ», ի դեպ, բազմաթիվ ճանապարհատրանսպորտային պատահարներ են եղել ու մարդիկ հայտնվել են հիվանդանոցներում, սկսում են արդարացիորեն չհավատալ արդարությանը՝ ասելով. «Ոստիկանները հայտնաբերում են անուղղելիներին, իսկ պապը՝ «Գազի Վազգենիչը», կարողանում է ինչ-ինչ ճանապարհներով արդարության վրայով անցնել»։ Ինչպես ավելի վաղ հայտնել էր ֆոտոլրագրողը, հոկտեմբերի 7-ին Ոստիկանության կազմակերպված հանցավորության դեմ պայքարի (6-րդ) գլխավոր վարչության, Ոստիկանության Արաբկիրի բաժնի քրեական հետախուզության բաժանմունքի ծառայողները ստացված օպերատիվ տվյալներն իրացնելիս Ոստիկանության Արաբկիրի բաժին էին բերման ենթարկել Երևան քաղաքի Սայաթ-Նովա պողոտայի 12 շենքի բնակիչ, նախկինում դատապարտված 24-ամյա Սերժ Արայի Վարդանյանին։ Վերջինս կասկածվում էր սեպտեմբերի 12-ին, գիշերը ժամը 03։00-ի սահմաններում Հրաչյա Քոչարի փողոցի 44/2 շենքի դիմաց Երևանի բնակիչ՝ 38-ամյա Կ. Գ.-ի պարանոցից ոսկյա շղթան պոկելու եղանակով բացահայտ հափշտակելու մեջ։ Ս. Վարդանյանը ոսկյա շղթան հափշտակելուց հետո դիմել էր փախուստի՝ տուժածին պատճառելով 200 հազար դրամի վնաս, իսկ տուժած Կ. Գ.-ն եղել էր իր Opel Astra մակնիշի կայանված վիճակում գտնվող ավտոմեքենայում ։