Ողբերգական դեպք Արմավիրի մարզում. հայտնաբերել են հրազենային վնասվածքով տղամարդու դի

Այսօր, փետրվարի 27-ին, ողբերգական դեպք է տեղի ունեցել Արմավիրի մարզում: Ժամը 17:20-ի սահմաններում, ոստիկանության Վաղարշապատի բաժին ահազանգ է ստացվել, որ Հայթաղ գյուղի տներից մեկում հրազենային վնասվածքով տղամարդու դի կա: Ինչպես դեպքի վայրից հայտնում է ֆոտոլրագրող Գագիկ Շամշյանը, նշված գյուղ են ժամանել ոստիկանության Վաղարշապատի բաժնի օպերատիվ խումբը՝ բաժնի պետ Արթուր Մկրտչյանի գլխավորությամբ: Ժամանել են նաև ոստիկանության Արմավիրի մարզային վարչության օպերատիվ խումբը՝ վարչության պետ Արսեն Այվազյանի և վարչության պետի տեղակալ Գագիկ Գաբրիելյանի գլխավորությամբ: Դեպքի մասին տեղեկությունը փոխանցվել է Հայաստանի քննչական կոմիտեի Արմավիրի մարզային քննչական վարչության Վաղարշապատի քննչական բաժին, որտեղից ժամանել են մեծ թվով քննիչներ՝ բաժնի պետ Կարեն Խաչատրյանի գլխավորությամբ: Ոստիկաններն ու քննիչները նշված գյուղի երկհարկանի շենքի 1-ին հարկում հայտնաբերել են տանտիրոջ՝ 60-ամյա Հարություն Հարությունյանի դին՝ ծնոտի մասում ստացած հրազենային վնասվածքով: Հայտնաբերվել են նաև որսորդական հրացան՝ մահացածի մարմնի վրա: Առաջին պահից դեպքի վայրում է նաև գյուղապետ՝ Սամվել Վարդանյանը: Այս պահին տեղում աշխատում են փորձաքրեագետն ու դատական բժիշկը: Քնիիչի հանձնարարականով նշանակվել է մի շարք փորձաքննություններ, այդ թվում՝ դիակի դատաբժշկական, հետքաբանական, մատնադրոշմային և այլն: Գյուղացիները ֆոտոլրագրողի հետ զրույցում ասում էին, որ մահացածը ամուսանացած էր, ուներ կին, երեխաներ թոռներ և նախկինում նույնպես ինքնասպանության փորձ է կատարել ոգելից խմիչքի ազդեցության տակ, սակայն ընտանիքի անդամները բուժման հատուկ կուրսեր են անցկացրել և նա երկար ժամանակ թողել էր խմիչքը: