Սերժ Սարգսյանը վերջակետ է դնում

«Առաջնագծում այս պահին որոշակի լարվածություն կա», - լրագրողների հետ հանդիպմանը երեկ հայտարարել է Լեռնային Ղարաբաղի պաշտպանության նախարար Լևոն Մնացականյանը: «Արցախպրես»-ի փոխանցմամբ, նախարարը կարծիք է հայտնել, թե լարվածությունը պայմանավորված է «դիպուկահարների պատերազմով»: Նա հավելել է, որ հոկտեմբերի 19-ին ադրբեջանական դիպուկահարի կողմից խոցվել է հայ զինծառայող, համարժեք պատասխանը չի ուշացել Ադրբեջանական կողմը, նշենք, որ երկու անգամ կիրառել է «ՍՊԱՅԿ» տիպի հեռակառավարվող հակատանկային հրթիռ, և երկու դեպքում էլ հարվածները եղել են անարդյունք: Ղարաբաղի պաշտպանության նախարարության հաղորդմամբ՝ ադրբեջանական կողմը «ՍՊԱՅԿ» է կիրառել երկու օր անընդմեջ՝ հոկտեմբերի 22-ին և 23-ին: Լևոն Մնացականյանն ասել է, որ հայկական կողմը չի պատասխանել, քանի որ գտնում է, որ դրա անհրաժեշտությունը դեռևս չկա, սակայն եթե նման իրավիճակներ հետագայում կրկնվեն միանշանակ պատասխանն ավելի ցավոտ է լինելու: «Մոտ օրերս հանդիպում ենք ունենալու ԵԱՀԿ Մինսկի խմբի ներկայացուցիչների հետ և այս հարցերը քննարկելու ենք նրանց հետ», - ասել է Մնացականյանը: Անցած տարվա ապրիլյան քառօրյա պատերազմից հետո Վիեննայում և Սանկտ Պետերբուրգում կայացած հանդիպումներում Հայաստանը և Ադրբեջանը պայմանավորվել էին սահմանային միջադեպերը հետաքննելու մեխանիզմներ մշակել ու ընդլայնել ԵԱՀԿ նախագահի անձնական ներկայացուցչի լիազորությունները։ Հայկական կողմն էլ ամենաբարձր՝ նախագահի մակարդակով հայտարարում էր, թե բանակցությունները չեն վերսկսվի, քանի դեռ այդ պայմանավորվածությունները կյանքի չեն կոչվել: Ժնևում Սարգսյան-Ալիև վերջին հանդիպումից հետո ԵԱՀԿ Մինսկի խմբի համանախագահներն ու երկու երկրների արտգործնախարարները, չհիշատակելով կոնկրետ Վիեննայի և Սանկտ Պետերբուրգի պայմանավորվածությունները, հայտարարեցին, որ Հայաստանի և Ադրբեջանի նախագահները համաձայնել են հավելյալ քայլեր ձեռնարկել շփման գծում լարվածությունը թուլացնելու համար։ Այդ հայտարարությունը որոշ փորձագետների առիթ էր տվել կարծելու, թե Հայաստանը հրաժարվել է Վիեննայի ու Սանկտ Պետերբուրգի պայմանավորվածություններից: Սակայն, պարզ է, որ հայկական կողմը որևէ նախապայմանից չի հրաժարվում: Բացի այդ, պաշտոնական Երևանը չի կարող հրաժարվել Ղարաբաղի հարցով կազմակերպվող բանակցություններից, դա կնշանակի՝ արձանագրել պատերազմի գնալու մասին: Հարցը հետևյալն է. ԵԱՀԿ Մինսկի խումբը սադրանքների դիմող Ադրբեջանին կարո՞ղ պարտադրել խաղաղություն, թե ոչ... Առանց անհրաժեշտ արձագանքի, համենայնդեպս, դա չի հաջողվում: Սերժ Սարգսյանը երեկ մասնակցել է ՊՆ Պաշտպանական ազգային հետազոտական համալսարանի (ՊԱՀՀ) կրթական նոր ծրագրի մեկնարկն ազդարարող նիստին, որտեղ իր ելույթում անդրադարձել է ԼՂ խնդրին: Նա հիշեցրել է, որ այս հարցով պաշտոնական Երևանն իր սկզբունքային մոտեցումները ներկայացրել է ՄԱԿ-ի Գլխավոր ասամբլեայի ամբիոնից: «Ցանկանում եմ, այնուամենայնիվ, ընդգծել մի քանի հանգամանք: Առաջին՝ այս փուլում մենք Արցախում ռազմական խնդիր լուծելու կամ դնելու նպատակ չունենք: Արցախի քաղաքացիական բնակչությունը հակառակորդի անխտրական կրակից պաշտպանելու խնդիրը մենք հիմնականում արդեն լուծել ենք և լուծել ենք վաղուց : Խնդրի խաղաղ կարգավորումը, ի թիվս այլ պայմանների, պետք է իսպառ բացառի որևէ ռազմական սպառնալիք Արցախի խաղաղ բնակչության հանդեպ: Երկրորդ՝ Լեռնային Ղարաբաղի հակամարտությունը, իսկապես, չունի ռազմական լուծում: Ուստի, հնարավոր չէ մեկ ձեռքով կրակել, իսկ մյուսով բանակցել այդ լուծումը գտնելու նպատակով: Կամ բանակցում ենք, կամ էլ՝ կրակում: Երկուսին էլ մենք պատրաստ ենք: Բանակցությունները պետք է տեղի ունենան զենքի լռության շնորհիվ ձևավորվող փոխադարձ վստահության պայմաններում: Կարճաժամկետ տակտիկական կամ քարոզչական առավելություն ստանալով` կողմերից ոչ մեկը որևէ էական հարց իր համար չի լուծում: Ընդհակառակը, սադրանքները պարզապես անհնարին են դարձնում լուրջ բանակցությունները»: Սերժ Սարգսյանը հարկ է համարել անդրադառնալ նաև վերջին օրերին Բաքվից իր հասցեին հնչող մեղադրանքներին, թե իբր նա խախտել է Ժնևյան հանդիպման պայմանավորվածությունը՝ դրանց մասին խոսելով: «Անկեղծորեն տարօրինակ է, և ես մեր հաջորդ հանդիպմանը շատ անհամբեր սպասում եմ, որպեսզի իմ գործընկերոջը հարցնեմ, թե ինչն է նրանց զայրացրել: Ընդ որում՝ խոսում են մարդիկ, ովքեր, փաստորեն, ընդհանրապես տեղյակ չպետք է լինեն մեր խոսակցությանը, որովհետև մենք երկուսով ենք խոսել, և եթե մենք պայմանավորվածություն ենք ունեցել որևէ մեկին չասելու, ապա ինչպես են իր օգնականները, կամ, չգիտեմ, տեղակալները և այլն, թեմային ծանոթացել: Ձեզ հավատացնում եմ՝ մեր խոսակցությունից ես կես բառ անգամ որևէ տեղ չեմ ասել: Իսկ ի՞նչ եմ ասել Շվեյցարիայի հայ համայնքի հետ հանդիպմանը՝ ես ասել եմ, որ որևէ հայ ղեկավար չի կարող փաստաթուղթ ստորագրել, որը խաթարելու է Լեռնային Ղարաբաղի անվտանգությունը: Սա՝ մեկ: Երկրորդ՝ ես ասել եմ, որ Ղարաբաղն Ադրբեջանից դուրս պետք է լինի», ասել է նա: Այսպես, Սերժ Սարգսյանը, ևս մեկ անգամ անդրադարձավ Ժնևի բանակցություններին՝ վերջակետ դնելով դրանց շուրջ շահարկումներին: Նա Ալիևին հասկացնում է, որ նրա ավանդական դարձած էժանագին «խաղի կանոններն» այլևս չեն գործում, եւ բոլորի համար պարզ է, որ այլ է բանակցություններին՝ միջնորդների ներկայությամբ Ալիևը, այլ է՝ Ադրբեջան վերադարձած Ալիևը: Այսինքն՝ «խոսքի ու գործի» միջև 180 աստիճան տարբերության առկայություն: Թամար Բագրատունի