Շվեյցարիայի նախագահը մեկնել է Իրան

Շվեյցարիայի նախագահ Յոհան Շնայդեր-Ամմանը պաշտոնական այցով մեկնել է Իրան:  ԻԻՀ նախագահի պաշտոնական կայքի փոխանցմամբ՝ Իրանի և Շվեյցարիայի նախագահների մասնակցությամբ ընդլայնված կազմով տեղի ունեցած հանդիպման ընթացքում Հասան Ռոհանին բարձր է գնահատել Շվեյցարիայի դերը Իրանի միջուկային խնդրի շուրջ տեղի ունեցած բանակցությունների ընթացքում: Իրանի նախագահը, անդրադառնալով երկկողմ հարաբերությունների հեռանկարին, նշել է, որ պատժամիջոցների վերացումից հետո հարաբերությունները խորացնելու համար նոր հեռանկարներ են բացվում: Յոհան Շնայդեր-Ամմանն իր հերթին կարևորելով է երկկողմ հարաբերությունների ընդլայնման անհրաժեշտությունը, նշել է, որ Իրանն ու Շվեյցարիան կարող են համագործակցել գիտության, զբոսաշրջության, բարձր տեխնոլոգիաների, արդյունաբերության ոլորտներում: Շվեյցարիայի և Իրանի նախագահները քննարկել են նաև տարածաշրջանի անվտանգությանն առնչվող հարցեր, շեշտելով, որ ահաբեկչության դեմ պայքարում, ինչպես նաև տարածաշրջանում կայունություն հաստատելու ուղղությամբ անհրաժեշտ է համատեղ ջանքեր գործադրել: