Կանազում դպրոց լինելու է, Փոստանջյանն ուզում է, թե չէ, ինձ չի հետաքրքրում. Հրանտ Թոխատյան

Դերասան Հրանտ Թոխատյանը լրագրողների հետ հանդիպմանը հայտնեց՝ ինչու է որոշել վարձակալել Կանազի մշակութային տունը: «Կանազի մշակութային տունը «Կանազ» գործարանի վաճառքից հետո մնացել էր անտեր, օդում կախված։ Մեր չինովնիկներից մեկի կողմից հանձնվել էր իր ընկերներին, հետո այդ ընկերները փորձեցին ինչ-որ բան այնտեղ անել, չստացվեց ու կեսից շատը վաճառել էին, մեջն էլ բավականին գույք կար։ Հետո նորից վերավաճառվել էր։ 2007թ. այդ շենքը շատ պատահական այն ժամանակվա էկոնոմիկայի նախարարության կողմից գտնվել էր, ու մեր ներկայացումը նայելուց հետո՝ առաջարկեցին մեզ։ Իմ երազանքն է միշտ եղել ունենալ մանկական թատերական դպրոց և մանկական թատրոն։ Շենքը ոչ մեկը ոչ մեկին նվեր չի տվել, դա պետական շինություն է։ Ես դիմել եմ վարձակալությամբ՝ 99 տարով, որ տարիները հերիքեն, որովհետև այն ծախսատար է»,- պարզաբանեց դերասանը։ Այնուհետև հայտարարեց, որ Կանազում այդ դպրոցը կլինի, ուզի դա Փոստանջյանը, թե՝ ոչ, իրեն դա բոլորովին չի հետաքրքրում: «Եթե այնտեղ աշխատի բենզալցակայան, ռեստորան կամ խաշանոց, կգաք և կասեք՝ ամոթ Ձեզ»:   Հրանտ Թոխատյանն անդրադարձավ նաև Փոստանջյանի այն արտահայտությանը, թե դերասանը «գավառական խնջույքների թամադա է». «Փոստանջյանն ինձ մեղադրում է այն բանում, թե ես գավառական խնջույքների թամադա եմ։ Ես չեմ ամաչում այն բանից, որ թամադայություն եմ արել։ Ես դա արել եմ շատ լավ, դրա համար մարդիկ ինձ շատ մեծ գումարներ են տվել։ Չկա մեր հանրապետությունում մեկը, որը թամադայության համար ստանար այնքան գումար, ինչքան ես ստանում էի այն ժամանակ, երբ զբաղվում էի դրանով։ Իսկ այդ գումարներով մենք բավականին լավ գործեր ենք արել»։