Բազմաթիվ ուղղություններով աշխատանքներ են տարվում. նախարարը ազատամարտիկների խնդրի մասին
Այսօր Ագզային ժողովում կառավարության հետ հարցուպատասխանի ժամանակ ՀՅԴ պատգամավոր Ռոմիկ Մանուկյանն ազատամարտիկների խնդիրների վերաբերյալ հարց հնչեցրեց: «Մի խումբ ազատամարտիկներ դիմել են ինձ հետևյալ հարցով: Գաղտնիք չէ, որ բազմաթիվ ազատամարտիկներ հերթագրված են բնակարան ստանալու համար և տարիներ շարունակ սպասում են այդ հերթին: Առաջարկում ենք, որ կառավարությունը դա հաշվի առնի, ու արտոնյալ հիպոթեքային վարկեր տրամադրեն այն ազատամարտիկներին, որոնք կառավարության համապատասխան որոշման համաձայն՝ հերթագրված են ու ունեն այդ հնարավորությունը»,- հայտարարեց պատգամավորը: Ի պատասխան՝ ՀՀ պաշտպանության նախարար Վիգեն Սարգսյանն ասաց. «ՀՀ նախագահը, երեկ խոսելով բանակի արդիականացման 7-ամյա ծրագրի մասին, հատուկ ուշադրություն և շեշտադրում արեց սոցիալական խնդիրներին և նախկին զինծառայողներին, զինհաշմանդամներին: Բազմաթիվ ուղղություններով աշխատանքներ են տարվում: Մինչև դեկտեմբերի ավարտ զոհված զինծառայողների անօթևան ընտանիքները և առաջին կարգի հաշմանդամություն ունեցող նախկին զինծառայողների անօթևան և բարելավման կարիք ունեցող ընտանիքները կստանան օրենքով նախատեսված փոխհատուցումները: Երևանում բնակվող ընտանիքները կստանան բնակարաններ, իսկ մարզերում՝ բնակարանային սերտիֆիկատներ: Մենք մտադիր ենք հիպոթեքային ծրագիր ներդնել այսօրվա զինծառայողների համար, դա մեծ լուծում կլինի, բոլոր դեպքերում այդ խնդիրներն ուշադրության կենտրոնում են: Երեկ ՀՀ նախագահի կողմից խնդիր է դրվել նաև նոր զինվորական հոսպիտալի կառուցման ուղղությամբ աշխատանքներ սկսելու: Դա մեզ համար առաջնահերթություն է, որովհետև այսօրվա կենտոնական հոսպիտալը չի համապատասխանում միջին ստանդարտին»:
Հետևեք մեզ Viber-ում
