«Ազգային հերոսին  կարմիր բերետավորները ծեծի են ենթարկում բանտում, ինչի՞ մասին խոսեմ». Ռուբեն Հախվերդյան

Այսօր փաստաբան Արայիկ Պապիկյանը տեղեկացրեց, որ սահմանափակվում է «Սասնա ծռեր» խմբի անդամ, գեղանկարիչ Աշոտ Պետրոսյանի ստեղծագործելու իրավունքը:  «Դատապարտյալների հիվանդանոց» ՔԿՀ-ում գտնվելու ժամանակ այդպիսի խնդիր չի առաջացել, մինչդեռ ըստ «Նուբարաշեն» ՔԿՀ-ի  ներքին կանոնակարգի՝ չի թույլատրվում  անազատության մեջ գտնվող անձանց  բերել գունավոր գրիչներ եւ թուղթ։ Միայն կապույտ գույնի գրիչ եւ տետր է թույլատրվում: Բանախոսներից երգիչ-երգահան Ռուբեն Հախվերդյանն էլ նշեց, որ մենք ապրում ենք անարդար պետությունում, եւ սա մի փոքր դետալ է այդ անարդարությունից. «Ամբողջ երկիրն է վերածված ՔԿՀ-ի»: «Սա մի քավոր-սանիկային պետություն է, որտեղ նույնիսկ ամուսնություններն են կատարվում հաշվենկատորեն: Կարծում եմ, որ եթե նույնիսկ այդ մատիտները տան, սա շատ փոքր հարց է: Օրինակ՝ մարդու ապրելու իրավունք է խախտված: Մարդիկ ապրելու իրավունք չունեն, դրա համար են խոպան գնում: Ազգային հերոսին  կարմիր բերետավորները ծեծի են ենթարկում բանտում, ինչի՞ մասին խոսեմ»,- ասաց Ռուբեն Հախվերդյանը՝ նշելով, որ անգամ Փարաջանովին կոմունիստական շրջանում բանտում թույլ են տվել ստեղծագործել։