«Կա՛մ բոլորը ունեն տարկետում, կա՛մ ոչ ոք չունի».սկզբունքային նախարարի մոտեցումը

ԱԺ «Ելք» խմբակցության պատգամավոր Մանե Թանդիլյանը  «Զինվորական ծառայության և զինծառայողի կարգավիճակի մասին» օրենքի նախագծի քննարկման ժամանակհարց ուղղեց պաշտպանության նախարար Վիգեն Սարգսյանին` արդյոք վերջինս հանդիպել է բողոքող ուսանողների հետ, որոնք դժգոհում են ակադեմիական տարկետման մասին՝ օրենքով առաջարկվող փոփոխությունից։ Վերջերս հանդիպել եմ  բազմաթիվ ուսանողների հետ, սակայն չգիտեմ` ձեր  նշած ուսանողները եղե՞լ են, թե ոչ,պատասխանեց նախարար Վիգեն Սարգսյանը: Մանե Թանդիլյանը նշեց նաև, որ բողոքող ուսանողները առաջարկում են, որ, օրինակ, տարկետման քանակը կրճատելը լինի ռոտացիոն կարգով: «Դա արդեն մեկ այլ խնդիր է առաջացնելու։Նեղանալու է ոսկե երիտասարդության այն շրջանակը, որոնք այդ քիչ տարկետումից կարողանալու են օգտվել. ես դեմ եմ դրան՝ կա՛մ բոլորը ունեն տարկետում, կա՛մ ոչ ոք չունի, դա է իմ սկզբունքային մոտեցումը»,- ասաց Վիգեն Սարգսյանը։ Նա նշեց, որ օրենքի նախագծի նպատակն է ապահովել 2015թ. դեկտեմբերի 6-ի փոփոխություններով ՀՀ Սահմանադրության դրույթների իրացումը: «Օրենքը նաեւ իրավական հիմքեր է ստեղծում լայն քննարկում անցած եւ այլ քաղաքական փոփոխությունների իրականացման համար: Փոփոխություններ են կրել պարտադիր զինվորական ծառայությունից ազատման, զորկոչից տարկետումների տրամադրման, զորակոչի կազմակերպման գործընթացի հետ կապված հարաբերությունները»,-ասաց Վիգեն Սարգսյանը: Նախարարը նշեց, որ ըստ այդ փոփոխությունների, զորակոչի հայտարարման իրավասությունը վերապահվել է ՀՀ կառավարությանը. «Ուսման տարկետումը փոխկապակցվում է հետագա ծառայության տեսակի հետ. բարձրագույն կրթություն ստացողը կարող է տարկետումից օգտվել, եթե պատրաստ է ծառայել որպես սպա՝ ստանալով սպայի աշխատավարձ եւ ուսման փոխհատուցում»: Նրա խոսքով, ըստ այդ փոփոխությունների, քաղաքացին, որն ընդունվում է ռազմական ուսումնական հաստատություն, կարող է ունենալ ընտրության հնարավորություն. «Կարող է 20-ամյա պայմանագիր կնքել զինված ուժերում ծառայելու հետ կապված, որը սոցիալական երաշխիքներ է տալիս, կարող է նաեւ 10 տարվա պայմանագիր կնքել»: