«Մենք չենք ուզում ձեզ դժոխք տանել. դուք առանց մեր տանելու՝ ինքներդ գնացեք». Փաշինյանը՝ նախարարին
Ազգային ժողովում այսօր քննարկման է դրվել «Զինծառայության և զինծառայողի կարգավիճակի մասին» օրինագիծը: Նախագծի հիմնական զեկուցողը ՀՀ ՊՆ Վիգեն Սարգսյանն էր, ում խոսքով՝ նախագծով սահմանվում են ՀՀ վարչապետի լիազորություններն, ըստ որոնց, պատերազմ հայտարարելու դեպքում որպես զինված ուժերի գերագույն հրամանատար վարչապետն ընդունում է պատերազմական ժամանակի քաղաքական և ռազմական բնույթի որոշումներ, իրականացնում է պաշտպանության ոլորտում, զորահավաքային նախապատրաստության և զորահավաքի գործընթացում օրենքով սահմանված այլ լիազորություններ: Քննարկման ժամանակ ԵԼՔ դաշինքի պատգամավոր՝ Նիկոլ Փաշինյանը նախարարին հայտնեց, որ եղել են դեպքեր, երբ ՀՀ զինված ուժերը ներգրավված են եղել քաղաքական պրոցեսներում: Ըստ նրա՝ գլխավոր շտաբի պետերի հասցեին անընդհատ հնչել են մեղադրանքներ, նրանց անունները շոշափվել են կոռուպցիոն սկանդալների մեջ և այստեղ ինստիտուցիոնալ հավասարակշռության շատ լուջ խնդիր կա: Սակայն Սարգսյանը նրա հետ չհամաձայնեց. «Սահմանադրության մեջ գրված է զինված ուժերի քաղաքական չեզոքության եւ զսպվածության մասին, բայց ունեցել ենք կոնկրետ դեպքեր, երբ զինված ուժերն ամբողջությամբ ներգրավված են եղել քաղաքական պրոցեսների մեջ: Ասում եք՝ ամբողջ դաշտը պետք է բերենք մաքսիմալ օրենքի կարգավորման ոլորտ, բայց ըստ էության, հաշվի առնելով երկրի՝ կառավարման խորհրդարանական մոդելի անցումը, ըստ էության, նախագահական մոդելի՝ գլխավոր շտաբն ու շտաբի կառուցվածքը թողնում ենք նույն տեղում, այս առումով պրոգրես չունենք»: Այնուհետև Փաշինյանը հայտարարեց, որ իրենք առաջարկներ են անում, որին նախարարը լուրջ չի վերաբերվում. «Շատ լավ առաջարկներ ենք անում՝ ասում եք շատ լավ կլիներ, որ գրավոր առաջարկեիք, լավն ենք ասում, ասում եք՝ չի լինի, մեր բոլոր առաջարկները ձեզ համար ճանապարհ են դեպի դժոխք, մենք առաջարկ անելու ռեզոն չունենք, որովհետև Պաշտպանության նախարարը շատ հանգիստ կասի՝ շատ լավ մտադրություն է. դուք ուզում եք մեզ դժոխք տանել: Մենք չենք ուզում ձեզ դժոխք տանել. դուք առանց մեր տանելու՝ ինքներդ գնացեք»:
Հետևեք մեզ Viber-ում
