ՌԴ-ից կոնյակով բեռնված 8 ավտոմեքենա հետ է ուղարկվել Հայաստան

ՌԴ-ն կոնյակների ներմուծման վերաբերյալ նոր չափանիշներ է ստեղծել, իսկ հայ կոնյակ արտադրողների մեծ մասը չի կարողանում համապատասխան փորձաքննություններ անցկացնել, քանի որ Հայաստանում տեխնիկապես հնարավոր չէ դա: Այսօր այս մասին ասաց Հայաստանի գինեգործների միության նախագահ Ավագ Հարությունյանը՝նշելով, որ ՌԴ-ից կոնյակով բեռնված ավտոմեքենաներ են հետ ուղարկվել Հայաստան. «Ես գիտեմ, որ մոտ 8 ավտոմեքենա ետ է եկել, բայց դրա մի մասը ոչ թե կեղծարարության, այլ ժամկետների խախտման պատճառով է եղել: Պրոցեդուրային խախտումներ կան՝ փաստաթղթերը ներկայացնելու, մի մասն էլ, իհարկե, կեղծ է եղել»։ Հարցին՝ թե ում արտադրանքն է դա եղել, հրաժարվեց պատասխանել։ «ՌԴ-ն մտցրել է ցուցանիշներ, որոնք Հայաստանում չեն չափվում, այդ գործիքները չունենք։ Կեղծարարները չեն կարող նախապես իմանալ, որ իրենք կեղծում են: Հայաստանից արտահանվող կոնյակի մի մասը կեղծ է, սա ասում են բոլորը, և ընդունում են բոլորը: Այդ կեղծարարության մակարդակը կարողանում էին անցյալում վերահսկել, թե՛ այստեղ՝ արտադրողները, թե՛ այնտեղ՝ ստուգողները: Կային լաբորատոր սարքավորումներ, որոնք թույլ էին տալիս այստեղ ստուգել, հետո հասկանալ կեղծիքի սահմանները, և այնտեղ հասկանալ իրենց չափորոշիչներով կեղծիքի սահմանները։ Թթվածնի 17 իզոտոպի քանակությունն այստեղ չենք կարող ստուգել սարքերի բացակայության պատճառով: Նույնիսկ ոչ կեղծ կոնյակ արտադրողները չգիտեն Օ 17-ի քանակությունը: Արդեն ունենք դեպքեր, որ վերադարձվել է մեր կոնյակը ռուսական շուկայից»,- ահազանգեց նա: