«Դատապարտյալը ոչ մեկի մոքրի մարդը չի … ». Էդմոն Մարուքյան

«Ելք» խմբակցության պատգամավոր Էդմոն Մարուքյանը քիչ առաջ ԱԺ  նիստի մեկնարկին նախքան օրակարգը հաստատելն իր ելույթում նկատեց, որ ՀՀԿ-ն Կառավարության հետ միասին մտել է դեստրուկտիվ գիծ, որը լավ տեղ չի տանում, դրանք հակաժողովրդական մոտեցումներ են: «Հետո չնեղանաք, որ ընդդիմությունը դեստրուկտիվ է, չասեք՝ ինչ ասում ենք, դեմ են, բա ո՞նց է՝ դուք ամեն ինչին դեմ եք:Դատապարտյալը ոչ մեկի մոքրի մարդը չի, որ գնում է տեսակցելու, նա չի գնում տեսակցելու՝ սնունդ տանի, սիգարետ տանի, նա գնում է սահմանադրական իրավունքն իրացնելու: ՀՀԿ-ական պատգամավոր Հրայր Թովմասյանը դեմ է «Ձերբակալված և կալանավորված անձանց պահելու մասին ՀՀ օրենքում փոփոխություններ կատարելու մասին» ՀՀ օրենքի նախագծին: «Ելք» խմբակցության պատգամավոր Էդմոն Մարուքյանը բնական համարեց Հրայր Թովմասյանի բացասական վերաբերմունքը նախագծի վերաբերյալ: Պատգամավորը նկատեց, որ մինչ Հրայր Թովմասյանի՝ Արդարադատության նախարարի պաշտոնը ստանձնելն օրենքը կիրառվել է հենց այնպես, ինչպես որ գրված է, և պատգամավորներն անարգել մտել են ՔԿՀ: Արձագանքելով Էդմոն Մարուքյանին՝ Հրայր Թովմասյանը նկատեց, որ մերժման պատճառները հստակ ներկայացվել են: «Կիմաստազրկվի քննիչի կողմից սահմանափակումներ դնելու ինստիտուտը և նախաքննության գաղտնիությունը` լինի դա պատգամավոր, նախարար, թե այլ մեկը: Եթե մեր գործընկերները գտնում են, որ դա հակասահմանադրական էլեմենտ ունի, հստակ ճանապարհ կա, ու կարող են դրանով շարժվել»,-ասաց Թովմասյանը: Հրայր Թովմասյանը հորդորեց «Ելքի» գործընկերներին թեկուզ համեմատություն անցկացնել, թե աշխարհի պառլամենտական կառավարման ձև ունեցող քանի երկրում քանի նախագիծն է ընդդիմության կողմից առաջադրվել ու անցել, ապա նա հորդորեց չտանարջատել ու չփորձել ջրբաժան մտցնել պառլամենտական մեծամասնության ու Կառավարության միջև, քանի որ  նույն թիմն են դրանք: Հորդորեց նաև ուսումնասիրել, թե աշխարհի քանի երկրում պատգամավորներն ունեն մուտքի իրավունք: