«Հիմա մի տրուբա կապել են վրաներս մի զընգ-զընգ այս կողմ, մի զընգ-զընգ այն կողմ». ամբաստանյալ

Կենտրոն եւ Նորք-Մարաշ վարչական շրջանների ընդհանուր իրավասության դատարանում այսօր տեղի ունեցավ  «Իգլա»-ի գործով դատաքննությունը: Ամբաստանյալներից Սանասար Գաբրիելյանը այսօր պատասխանեց նաև դատախազի հարցերին: Ինչպես նշեց՝ ինքը բանակին բավականին լուրջ ծառայություններ է մատուցել և տարիներ շարունակ դրսից զենք է բերել բանակի համար: Սանասար Գաբրիելյանը «Իգլա» տեսակի  զենիթահրթիռային համակարգ  50000  դոլարով ցանկացել է ձեռք բերել բանակին տրամադրելու համար: Գաբրիելյանը հայտնեց, որ առանց մարտկոցի հրթիռը պետք է պահեր Արցախում. «Գնում էի Արցախ, ընկերոջս հետ պայմանավորված էի: Պետքա ուտեյինք, խմեյինք: Հետո էլ տարածքներն եմ նկարել, որ գլուխ գովալու համար ասեմ՝ ստեղ էլ եղա»: Դատախազի հարցին, թե Բաբայանը տեղյակ էր այս ամենից, Սանասար Գաբրիելյանը պատասխանեց. «Բաբայաննա փողը տվել ա, որ իմանա՞ր: Նա ով փողը տալիս ա, նա էլ՝ տանցույետ»: Այնուհետև հայտարարեց. «Ասեցի  այս անգամ մի լավ բան նվիրեմ իմ բանակին, դրանից առաջ իմ տղաների համար Բելառուսիայից 42 միավոր զենք էի բերում, ոչ ոք չէր ասում՝ էս ինչի ես բերել, որտեղից ես բերել, ինչի չէին բռնում, ինչի էին վերեւ գցում, հերոսացնում: Հիմա մի տրուբա  կապել են վրաներս մի զընգ-զընգ այս կողմ, մի զընգ-զընգ այն կողմ»: Սանասար Գաբրիելյանը  նաեւ նշեց՝  Սամվել Բաբայանը իրեն խորհուրդ է տվել այդ խողովակը դնել մի արկղի մեջ եւ պահել. «Ասեց մեր կռիվը չի պրծել, մասն էլ,  շուռուպն էլ օգուտ: Մի աֆիցերի կտաս, կտանի զինանոց»: Դատավոր Արշակ Վարդանյանը  հարց տվեց՝ արդյոք ավելի ճիշտ չէր այդ գումարը ուղղել բանակին, կամ ինչ- որ հիմնադրամների: «Չեմ իմանում այդ գումարը ո՞ւր է գնում,  գնացող էր գումարը, թող այսքան ժամանակ գնար: Ես ուզել եմ իմ կողմից, իմ սրտի թեթեւության համար  անձամբ իմանամ, որ ես իմ բանակին ինչ- որ մի բանով օգնում եմ»,- ասաց Սանասար Գաբրիելյանը: Գործով ամբաստանյալ  Արցախի  պաշտպանության բանակի նախկին հրամանատարին զայրացրեց այն հանգամանքը, որ պարբերաբար  շոշափվում էր Իգլա բառը. «Ես տրուբա եմ օգտագործում, ես Իգլա չեմ օգտագործում, քննության ժամանակ այդքան շոշափել ենք այդ հարցը, չեք գրել»։