Ռուսաստանն ուզում է, որ Սիրիան միասնական մնա. Լ. Շիրինյան

Հայելի ակումբում կայացած ասուլիսի ժամանակ քաղաքագետ Լևոն Շիրինյանը դիտարկեց ԱՄՆ-ի և ՌԴ-ի միջև տեղի ունեցած երկարատև բանակցությունները և Սիրիայում  հաստատված հրադադարը: Ըստ քաղաքագետի` այս պահից սկսած թևակոխում ենք Ռուսաստանի և ԱՄՆ-ի շահերի համատեղման շրջանը: Այդուհանդերձ  այդ շահերի տարբերությունն արմատական է : «Ռուսաստանն ուզում է, որ Սիրիան միասնական մնա, բայց բնական է, որ դա դուր չի գալիս ԱՄՆ-ին, որն էլ ուզում է Սիրիան մասնատել տարբեր շրջանների: Սա էլ իր հերթին համընկնում է Թուրքիայի և Իսրայելի շահերի հետ: Այնպիսի իրավիճակ է ստեղծվել, որ յուրաքանչյուրն ուզում է իր շահն առաջ տանել»,-ասում է քաղաքագետը: Վերջինս կարծում է, որ ԱՄՆ-ն այս հարցում, այնուամենայնիվ, նահանջելու է, բայց ոչ թե այն պատճառով, որ թույլ է կամ վախենում է, այլ ԱՄՆ-ի հետաքրքրությունն արդեն տասը տարի է, որ ուղղված է դեպի Արևելյան Ասիան: «Մերձավոր Արևելքում ռուսներին զիջելը շատ բան չի նշանակում նրանց համար, ուրիշ հարց է, որ դրա դիմաց նրանք կստանան ռուսների գաղտնի համակրանքը կամ համաձայնությունը Ավստրալիայում կամ դրա հյուսիսային նահանգներում ԱՄՆ-ի ուժեղացման համար»,-նշեց պարոն Շիրինյանը: