Արտոնությունների համակարգ, թե ոնց անենք, որ փախչենք բանակից

Ազգային ժողովի կրթության եւ գիտության հարցերի մշտական հանձնաժողովում այսօր ի շարս այլ հարցերի քննարկվեց նաեւ խորհրդարանական լսումներ հրավիրելու հարցը: Հանձնաժողովը Վարդան Բոստանջյանի նախագահությամբ որեշեց առաջիկայում անցկացնել խորհրդարանական լսումներ՝ «Կրթական բարեփոխումների ընթացքը նախնական եւ միջին մասնագիտական ուսումնական հաստատություններում. ձեռքբերումները, հիմնախնդիրները եւ դրանց բարելավմանն ուղղված առաջարկները» թեմայով: Սակայն հանձնաժողովի քննարկումը ծավալվեց հետաքրքիր ուղղությամբ եւ հանձնաժողովականները ներգրավվեցին  Զինապարտության մասին նոր օրենքի խնդրահարույց կետերի քննարկմանը: Ելք խմբակցության ներկայացուցիչ Արարատ Միրզոյանը ուշադրություն հրավիրեց թեմայի վրա՝ ասելով, որ ինքը մեծ վտանգներ է տեսնում ուսման հիմքով տարեկետման իրավունքի վերացման դրույթում եւ հարկ է համարում քննարկում կազմակերպել հանձնաժողովում: Հիշեցնենք Զինապարտության և զինվորական ծառայության մասին օրենսդրական նոր նախաձեռնություն ուշագրավ փոփոխություն է սահմանում ուսման հիմքով զինծառայությունից տարկետում ստանալու կարգում։ Նոր օրենքով 18 տարեկան բոլոր տղաները պարտավոր են բանակ զորակոչվել։ Տարկետում կտան նրան, ով կորոշի, որ բակալավրիատն ավարտելուց հետո պատրաստ է 2-ի փոխարեն 3 տարի ծառայել՝ որպես սպա: Դրա համար նա ստանալու է աշխատավարձ եւ պետությունից լիովին փոխհատուցում թե՛ իր բակալավրիատի ուսուցման, թե՛ հետագայում նաեւ մագիստրատուրայի համար: Նա պարտավորվում է ծրագրից դուրս չմնալու համար ապահովել միջինից ոչ ցածր միավոր ու շաբաթ օրերը նվիրում է ռազմական պատրաստության գործընթացին` Վազգեն Սարգսյանի անվան ռազմական ակադեմիայում: Պարտադիր զինծառայությունից տարկետում է տրամադրվում նաեւ առողջական և ընտանեկան վիճակի պատճառով, եթե քաղաքացին ընտրվել է ԱԺ պատգամավոր, ՀՀ կառավարության որոշմամբ և նպատակային ուսումնառության համար։ Նախագծով նպատակային ուսումնառությունը սահմանվում է այսպես` Հայաստանի Հանրապետությունում հավատարմագրված բարձրագույն ուսումնական հաստատություններում բակալավրի կամ դիպլոմավորված մասնագետի կամ ինտեգրացված կրթական ծրագրով սովորող քաղաքացուն` եթե նա Հայաստանի Հանրապետության պաշտպանության նախարարության հետ կնքում է քաղաքացիաիրավական բնույթի պայմանագիր՝ ուսումնառության ընթացքում ռազմական պատրաստություն անցնելու և ուսումնառության ավարտից հետո Հայաստանի Հանրապետության պաշտպանության նախարարության կողմից նշված վայրում և պայմաններում զինվորական ծառայություն անցնելու մասին: Սույն կետի համաձայն քաղաքացուն տարկետում տրվում է մինչև ուսումնառության ավարտի օրը ներառյալ, սակայն ոչ ավել, քան նրա 26 տարին լրանալու օրը։ <<Սա հարված է չարչրկված գիտելիքահեն տնտեսության, արդիական տնտեսությանը եւ առհասարակ>> ասաց Արարատ Միրզոյանը ցիտելով պաշտպանության նախարար Վիգեն Սսարգսյանին, որ սույնով թվակազմի եւ սահմանում զինվոր պահելու խնդիր չի լուծվելու, որովհետեւ տարեկան կտրվածքով սույն հիմքով 140-150 ուսանողի է տարեկետում տրվում: Նա կոչ արեց հանձնաժողովական գործընկերներին մտածել այս մասին եւ լայն քննարկումներ նախաձեռնել: Վարդան Բոստանջյանը եւս առիթն օգտագործեց՝ ասելով, որ Հայաստանում զինվորական ծառայությունից փախչելը դարձել է հոգեվիճակ: Նա կոչ արեց ձերբազատվել այդ հոգեվիճակից, քանի որ ծառայելը պատիվ է ցանկացած մարդու համար.<<Ես դեմագոգություն չեմ անում, այլ ամբողջ սրտով եմ այդ մասին խոսում>> վստահեցրեց պատգամավորը նկատելով, որ արտոնությունների համակարգն ինքնին շատերն ընկալում են՝ <<Ոնց անենք, որ փախնենք բանակից>>: Ապա անդրադառնալով Միրզոյանի մտահոգություններին հարցով.<<Դուք կասկածո՞ւմ եք, որ կրթված մարդը վերջիվերջո ամեն ինչ անելու է, որ կրթված լինի>>, ապա կարծիք հայտնեց, որ չպետք է մեծ հաշվով ընդվզել արտոնությունների համակարգի դեմ.<<Եթե մարդը լավ պարող է, լավ երգող, նվագող է, բնությունը նրանց մեկ-երկու հատ է ստեղծել, ուրեմն չպետք է տանել նրանց բանակ>>:Սակայն Արարատ Միրզոյանը ասաց, որ կիսում է հոգեբանությունը փոխելու Բոստանջյանի մոտեցումը, սակայն խոսքը միայն Հենրիկ Մխիթարյանների ու Համասյանների մասին չէ, կան մարդիկ, որոնք լաբորատոր աշխատանքներում մեծ գործեր են անում ու թեեւ հանրաճանաչ չեն, բայց մեծ զարգացումների համար հիմքր են գցում: Մարինե Ասատրյան