Չեմ մասնակցի Պողոսյանի խոշտանգմանը. Սեֆիլյանը լքեց դահլիճը

«Հարյուրամյակն առանց ռեժիմի» շարժման առաջնորդ Ժիրայր Սեֆիլյանը քիչ առաջ լքեց նիստերի դահլիճը՝ հայտարարելով, որ չի կարող մասնակցել Ներսես Պողոսյանի խոշտանգման արարողությանը։ Պատճառն այն է, որ 22 օր հացադուլի մեջ գտնվող Ներսես Պողոսյանը իր պաշտպանների պնդմամաբ ի վիճակի չէ նիստին մասնակցել եւ, չնայած այդ հանգամանքին, նիստը չի հետաձգվում: Ներսես Պողոսյանի համար այսօր շտապօգնություն է հրավիրվել դատարան, սակայն դատավոր Տաթեւիկ Գրիգորյանը հայտարարեց, որ ըստ բժշկական տեղեկանքի, Պողոսյանը իր ոտքով գնացել է բժշկի զննության համար նախատեսված սենյակ եւ հրաժարվել է բժշկական օգնությունից: Ներսես Պողոսյանը, սակայն, տեղից բացականչեց. «Սուտ ա, ես իմ ոտքով չեմ գնացել: Ես բժշկին ասեցի, եթե ես 3 անգամ հացադուլ եմ հայտարարել, որից մեկը ջրադուլով,  դրա հետեւանքները ինչպինսին կարող են լինել, բժիշկը բանավոր ասեց՝ ծանր: Ես էլ ասեցի՝ դե էդքան բանը գրի ուղարկի դատավորին»,- տեղից ասաց Պողոսյանը: Դատավոր Տաթեւիկ Գրիգորյանը հորդորեց նրան մնալ նիստերի դահլիճում, սակայն Սեֆիլյանը չփոխեց իր որոշումը։ Պաշտպան Տիգրան Հայրապետյանն էլ հայտարարեց, որ այսուհետ հնարավոր է՝ չմասնակցեն որևէ դատական նիստի, եթե այսօրվա նիստը հետաձգելու միջնորդությունը մերժվի։ Ժիրայր Սեֆիլյանի քայլից հետո դահլիճը լքեցին նաև Ներսես Պողոսյանը, նրա պաշտպանները և Տիգրան Հայրապետյանը։ Այս պահին դատավոր Տաթեւիկ Գրիգորյանը հեռացել է խորհրդակցական սենյակ՝ որոշում կայացնելու, իսկ պաշտպանները հրաժարվում են մտնել նիստերի դահլիճ։