Բաքվեցի ժամկետնանց մանր չինովնիկը նորից բաց թողեց հնարավորությունն ի ցույց չդնել իր սահմանափակ լինելը. ՀՀ ԱԳՆ-ն արձագանքում է Ալիևի օգնականին
ՀՀ արտաքին գործերի նախարարությունն անարաձագանք չի թողել Ադրբեջանի նախագահի օգնական Նովրուզ Մամեդովի գրառումը: «Բաքվեցի ժամկետնանց մանր չինովնիկը նորից բաց թողեց հնարավորությունը լռել ու ի ցույց չդնել իր սահմանափակ լինելը», - Twitter -ի իր միկրոբլոգում գրել է ՀՀ ԱԳՆ մամուլի խոսնակ Տիգրան Բալայանը: Նշենք, որ Մամեդովն իր Facebook-յան իր էջում գրել էր, թե, իբր, ՀՀ նախագահ Սերժ Սարգսյանը խախտել է բանակցություններում ձեռք բերված պայմանավորվածությունները: «Որոշում էր կայացվել, որ բացի համաձայնեցված դրույթներից, այլ հայտարարություններ չեն արվելու: Չնայած խոստմանը՝ նա չի պահել այն», - գրել է Ադրբեջանի նախագահի օգնականը: Նա նշել է նաև, թե «Հայաստանի նախագահը գիտի և թող չմոռանա, որ Լեռնային Ղարաբաղը եղել է և կմնա Ադրբեջանի անբաժանելի մաս»: Նախօրեին Ժնևում կայացել է ՀՀ նախագահ Սերժ Սարգսյանի և Ադրբեջանի նախագահ Իլհամ Ալիևի հանդիպումը, որից հետո ՀՀ նախագահը շվեյցարահայ համայնքի ներկայացուցիչների հետ իր ներածական խոսքում ներկայացրել է Ադրբեջանի նախագահի հետ բանակցությունների արդյունքները:
Հետևեք մեզ Viber-ում
