Յուրաքանչյուր ընտանիքում կա առնվազն 1 բռնության ենթարկվող երեխա. Ն. Դուրյան

«Ընտանեկան բռնության կանխարգելման եւ ընտանեկան բռնության ենթարկված անձանց պաշտպանության մասին» օրենքի վերաբերյալ խորհրդարանական լսումներին այսօր ՀՀ ոստիկանության քրեական հետախուզության գլխավոր վարչության անչափահասների իրավունքների պաշտպանության և ընտանեկան բռնության դեմ պայքարի վարչության պետ, ոստիկանության գնդապետ Նելլի Դուրյանն իր ելույթում ներկայացրեց վիճակագրական մի շարք տվյալներ: Ինչպես տեղեկացրեց՝  2012 թ-ին գրանցվել է ընտանեկան բռնության 728 դեպք, 2016-ին՝ 756 դեպք: «Դեռեւս 2012թ. ունեինք 728 ընտանեկան բռնության դեպք, 2016թ.՝ 756 դեպք, որից ամուսնու կողմից՝ 481, կնոջ կողմից՝ 20, ծնողի կողմից երեխային 66 բռնության դեպք: Յուրաքանչյուր ընտանիքում կա առնվազն մեկ երեխա, որը նույնիսկ, եթե չի ենթարկվում ֆիզիկական բռնության, ապա հոգեբանական բռնության՝ անպայման»,- տեղեկացրեց նա: Նելլի Դուրյանի խոսքով՝ հայ ընտանիքներում բռնության դեպքեր են լինում, ուստի պետք է արվի ամեն ինչ, զոհերին, ինչպես նաև բռնություն կիրառած մարդկանց օգնելու նպատակով։ «Որպեսզի սա չլինի, պետք է լինի համապատասխան օրենք: Միգուցե օրենքում հստակեցումների կարիք կա: 20 տարի աշխատելով ընտանիքների հետ՝ չեմ ուզում փակել իմ աչքերը. պետք է ասեմ, որ, այո, կա բռնություն: Ինքնասպանության դեպք կա, որ ընտանեկան բռնության արդյունքում է եղել: Այս օրենքով մենք կկարողանանք կանխարգելել, պաշտպանել ու օգնել»,- նշեց տիկին Դուրյանը: