«Թող տա, մեկի գլուխը ջարդի, զոհը կգնա գերեզման, երեխան էլ մնա որբ ». Վիգեն Քոչարյան
«Արդյոք օրենքում անմեղության կանխավարկածի նկատմամբ ոտնձգություններ չկա՞ն և ի՞նչ է նշանակում, «ենթադրաբար բռնություն գործադրած անձ»։ Որքանո՞վ է նման անձը պաշտպանված զերծ մնալ սադրանքից», - ԱԺ-ում ընթացող «Ընտանեկան բռնության կանխարգելման մասին» օրինագծի քննարկման ժամանակ ՀՀ արդարադատության փոխնախարար Վիգեն Քոչարյանից հետաքրքրվեց «Ելք» խմբակցության պատգամավոր Մանե Թանդիլյանը:
« «Ենթադրաբար բռնություն գործադրած անձ» սահմանումը պայմանավորված է անմեղության կանխավարկածի պաշտպանությամբ։Հակառակ դեպքում կստացվեր, որ նախնական իրավիճակի նույնականացման ընթացքում մենք այդ մարդուն արդեն իսկ ընտանեկան բռնություն գործադրող պիտի ճանաչենք, այն դեպքում երբ դատական որոշումը բացակայում է։ Դրանից խուսափելու համար համապատասխան անձին, մենք ենթադրաբար ընտանեկան բռնություն գործած անձ ենք համարում՝ դրանով իսկ անմեղության կանխավարկածը պաշտպանելով:Ենթադրաբար մեղադրվող անձը կարող է բողոքարկել որոշումը », - նշեց փոխնախարարը:
«Ինչո՞ւ խորհուրդը, որը պետք է ստեղծվի, կից է վարչապետին, այլ ոչ ԱԺ-ին:Այստեղ շահերի բախում եմ տեսնում, ինչո՞ւ ոչ ԱԺ հանձնաժողովին է կից, այլ վարչապետին», - հետաքրքրվեց Մանե Թանդիլյանը։
Վիգեն Քոչարյանն էլ նկատեց, որ ԱԺ գործառույթները սահմանադրությամբ են ամրագրված և դա գործադիր իշխանության գործառույթն է։
«Այդ խորհուրդը գործադիր իշխանության ղեկավարին կից է ձևավորվել, բայց բովանդակային առումով վերազդելու հնարավորություն գոյություն չունի, քանի որ այն աշխատելու է իր առանձին աշխատակարգով, իր օրակարգը ինքն է որոշելու և ազատ է լինելու այս ոլորտին վերաբերող ռազմավարություն, ծրագրեր առաջարկությունների տեսքով գործադիրի ղեկավարին ներկայացնելու հարցում», - նշեց նա։
Օրական երկու անգամ ընտանեկան բռնությունների դեպքերի վերաբերյալ դիմում են ոստիկանություն, որից 17 %-ն ուղղակիորեն կապված է ընտանեկան բռնության հետ, ասաց Վիգեն Քոչարյանը։
Նա ընդգծեց` օրինագիծն ուղղված է հայ ընտանիքի պաշտպանությանն, իսկ օրինագծի ընդդիմադիրների պնդումներն առ այն, որ բռնությունը դատապարտելու համար քրեական օրենսդրություն կա, ամբողջությամբ չեն արտացոլում ընտանիքի պաշտպանության հարցը։
«Քրեական օրենսդրություն կա, կարող են ասել՝ թող տա գլուխը ջարդի, սպանի, ի՞նչ ա եղել` կգնա պատժի կենթարկվի։ Զոհը կգնա գերեզման, երեխան էլ որբ կմնա, հիմա այս երկու մոտեցումներից ո՞րն է ուղղված ընտանիքի պաշտպանությանը, այն որ մենք կանխարգելու՞մ ենք բռնությունները, թե՞ քրեական պատասխանատվության ենթարկում»,- ասաց նա։
Հետևեք մեզ Viber-ում
