Հնարավոր է՝ կոտրվեն ծառեր եւ վնասվեն տանիքներ. Գագիկ Սուրենյանը զգուշացնում է

Օդերեւութաբանական կանխատեսումների համաձայն, այսօր՝ հոկտեմբերի 16-ին, շրջանների զգալի մասում, հատկապես՝ կեսօրից հետո սպասվում է կարճատեւ անձրեւ եւ ամպրոպ, ամպրոպի ժամանակ հնարավոր է քամու ուժգնացում: ՀՀ ԱԻՆ հիդրոմետ ծառայության օդերեւութաբանության կենտրոնի պետ Գագիկ Սուրենյանը ֆեյսբուքյան իր էջում գրել է. «Հոկտեմբերի 16-ին առանձին շրջաններում՝ հատկապես Լոռիում, Տավուշում եւ Գեղարքունիքում սպասվում է քամու ուժգնացում՝ 25-30 մ/վ արագությամբ, հնարավոր է կոտրվեն ծառեր եւ վնասվեն տանիքներ, ուստի ազգաբնակչությանը խորհուրդ ենք տալիս ցուցաբերել հնարավորինս զգոնություն»: Արդեն վաղվանից եղանակը կլինի առանց տեղումների: Հոկտեմբերի 17-ի գիշերը Սյունիքում եւ Արցախում սպասվում է անձրեւ եւ ամպրոպ: Հոկտեմբերի 17-ի ցերեկը, 18-21-ը սպասվում է առանց տեղումների եղանակ: Քամին արեւմտյան՝ 3-8մ/վ: Օդի ջերմաստիճանը 17-ի գիշերը կնվազի 3-5 աստիճանով, 18-ի ցերեկը, 19-20-ը աստիճանաբար կբարձրանա 4-6 աստիճանով: Երեւան քաղաքում` Հոկտեմբերի 17-21-ը սպասվում է առանց տեղումների եղանակ: