Բոյկոտ Բագրատ Եսայանի կնոջ դեմ

Քիչ առաջ hayeli.am-ի խմբագրություն էին զանգահարել Երևանի թիվ 17 հենաշարժական համակարգի խախտումներ և մտավոր հետամնացություն ունեցող երեխաների հատուկ դպրոցի ուսուցչական անձնակազմից և բողոքում էին, որ իրենց դպրոցում անօրինական կարգով տնօրեն են նշանակել: Բանն այն է, որ հաստատության տնօրենը պետք է ընտրվի մրցութային կարգով` խորհրդի կողմից: Բայց համապատասխան  նիստերը չեն կայացել: Իսկ այդպիսի դեպքերում կարգը նախատեսում է, որ տնօրեն նշանակելու իրավունքը վերապահվում է նախարարին: Թեկնածուները երեքն են եղել` Վերգինե Եսայանը (Երեւանի բժշկամանկավարժական գնահատման կենտրոնի տնօրենի տեղակալ), Հայարփի Մինասյանը (Երեւանի հենաշարժական համակարգի խախտումներ ունեցող երեխաների թիվ 17 հատուկ դպրոցի մանկապատանեկան կոլեկտիվի կազմակերպիչ՝ նախկին տնօրենի դուստրը) եւ Մարինե Աղաջանյանը (Երեխաների խնամքի եւ պաշտպանության թիվ 2 գիշերօթիկ հաստատության տնօրեն): Նրանք համոզված են, որ կրթության եւ գիտության նախարարությունն ուզում է ամեն գնով այս դպրոցի տնօրեն նշանակել դաշնակցական, կրթության եւ գիտության նախարարի խորհրդական Բագրատ Եսայանի կնոջը՝ Վերգինե Եսայանին։ «Օրենքով նշված մրցույթները տեղի չեն ունեցել: Որոշել են և նշանակել տնօրեն: Այս պահին գործը դատարանում է»,- ասաց ուսուցչուհիներից մեկը, սակայն չցանկացավ նշել անունը: Ծնողներից մեկն էլ նշեց, որ դպրոցի խորհրդի նիստերը անընդհատ հետաձգվում էին նախարարության միջնորդությամբ. «Խորհրդի չորս նիստ տապալվել է։ Եթե նիստերը կայանային, ապա իրենք էլ էին վստահ, որ իրենց թեկնածուն չի անցնելու»: Նշենք, որ Երևանի թիվ 17 հենաշարժական համակարգի խախտումներ և մտավոր հետամնացություն ունեցող երեխաների հատուկ դպրոցը բազմիցս հայտնվել է ուշադրության կենտրոնում, նախկինում ևս ծնողներն ու ուսուցչական կազմը բողոքել են տնօրենից: Վերգինե Եսայանը ՀՀ ԿԳ նախարար  Լեւոն Մկրտչյանի ՀՅԴ-ական խորհրդական Բագրատ Եսայանի կինն է: