«Գարնանը մսի գինը 5000 դրամ կլինի». Հրաչ Բերբերյան

Ագրարագյուղացիական միավորման նախագահ Հրաչ Բերբերյանն այսօր լրագրողների հետ զրույցում փաստեց, որ դեռ տարեսկզբից ասել են, որ տարին այդքան էլ բարեհաջող չէ գյուղատնտեսության համար։  «Ե՛վ բանջարաբուծության մեջ, և՛ տեխնիկական կուլտուրաներում, բնականաբար, այն բերքը չունեցանք, որը սպասում էինք։ Իսկ ամառվա երաշտի հիմնական վնասն անասնակերի կուտակումն էր, մենք ունեցանք չորացած արոտավայրեր, որտեղ գյուղացին չէր կարողանում կերի կուտակում անել: Այնինչ այդ ժամանակ պետք է միջոցառումներ անցկացվեին։ Պետք է բացատներից հնձեին կանաչ խոտը և կուտակեին, մասսայական հունձ պետք է կազմակեպվեր, որ մեղմացնեին այս վիճակը, բայց չարեցին»։ Ագրարագյուղացիական միավորման նախագահի խոսքով՝ Գյուղնախարարությունում չեն հասկանում՝ անասնապահությունը գյուղատնտեսության ճյո՞ւղ է, թե՞ ոչ։ «Եթե նախորդ տարի խոտը կարելի էր ձեռք բերել 400-600 դրամով, ապա այսօր այն 1200-2000 դրամ է՝ ըստ խոտի որակի և հակի ծավալի։ Բնականաբար, դա պետք է ազդեր մսի գնի վրա: Գոնե այդ անասնակերը բերենք, անվճար բաժանենք գյուղացուն»,- առաջարկեց նա: Եթե այսպես շարունակվի, լինի գլխաքանակի անկում, ապա Հրաչ Բերբերյանի մեկ այլ կանխատեսմամբ՝ մենք գարնանը կունենանք 5000 դրամի հասնող միս։