Կերա՞ր, աղջի. ՀՀԿ-ի ավագանին դատի կտա Տարոն Մարգարյանին վիրավորողին

«Դուք իրավունք չունեք վիրավորել Երեւանի քաղաքապետին: Դուք ինչպե՞ս եք պատասխան տալու, որ ես ձեզ դատի տամ, ես պատրաստ եմ հենց վաղը ձեզ դատի տալու ձեր հերյուրանքների համար: Դուք ծիծաղելի հարցեր եք տալիս, եւ ես ձեզ զգուշացնում եմ, որ ես ձեզ դատի եմ տալու հերյուրանքների համար: Ոչ մեկ ձեզ եւ որեւէ մեկի իրավունք չի տվել ՀՀ նախագահին, ով ուզում է լինի, այդպիսի վիրավորանքներ հասցնել եւ Երեւանի քաղաքապետին, քաղաքապետարանի ավագանու նիստին, էդ իրավունքը ձեզ ոչ մեկ չի տվել»,-Երեւանի ավագանու Հանրապետական խմբակցության անդամ Կամո Հովհաննիսյանը պատրաստվում է դատի տալ ավագանու «Երկիր ծիրանի» խմբակցության ավագանու անդամ Մարինա Խաչատրյանին, քանի որ վերջինս, ըստ Հովհաննիսյանի, վիրավորել է Երեւանի քաղաքապետ Տարոն Մարգարյանին։ Երեւանի փոխքաղաքապետ Կամո Արեյանն էլ շարունակելով Կամո Հովհաննիսյանի խոսքն ասաց, որ եթե որոշել են ինչ-որ ցնորքով քաղաքային իշխանության կյանքը դժոխքի վերածել, ապա դա չի հաջողվի: «Ես այլեւս համոզված եմ՝ տհասության բնածին վկայականով աստված ձեզ արդեն դարձրել է դժոխքի բաժին, մենք ձեզ դրախտ բերողը չենք»,- ասաց Կամո Արեյանը: Վերջինիս խոսքերն այնքան ոգեւորեց նույն խմբակցության անդամ Աստղիկ Գեւորգյանին, որ նա սկսեց միայնակ ծափահարել Կամո Արեյանին: Կամո Արեյանը շարունակեց իր խոսքը. «Հաշվի առեք եւ ռեխներդ բացելուց առաջ քաղաքապետի անձի եւ մեր վաստակի եւ աշխատանքի հանդեպ հաշիվ տվեք ձեզ, որ կզրկվեք մի կտոր դրախտի այս բաժնից»: Հանրապետական խմբակցության ավագանու անդամներից մեկն էլ Կամո Արեյանի խոսքից հետո ասաց. «Կերար, աղջի»: