3 տոկոսանոց վարկեր 1 տարով` նման բան չկա.Իգնատի Առաքելյան

Գյուղատնտեսության նախարար Իգնատի Առաքելյանը դեմ է, որ մսի գնի բարձրացումը հասարակության շրջանում ստեղծել է «պանիկա»։ Ի.Առաքելյանն ընդունեց, որ թանկացում կա, ասաց նաև, թե խոսել է գյուղացիների հետ և կարող է ասել, որ նրանք տավարի ու ոչխարի մսի գինը չեն թանկացրել, չնայած նրան, որ կա կերի գնի թանկացում։ «Չեն թանկացրել, որովհետև խնդիր ունեն իրացման հետ։ Խոզի մսի թանկացումն ավելի շատ պայմանավորված է նրանով, որ միջազգային շուկայում խոզի միսն է թանկացել։ Ոչխարի մսի արտահանումը կրկնապատկվել է, դա էլ բերել է ոչխարի մսի թանկացման, տավարի մսի թանկացումը եղել է ընդամենը 150 դրամով, դա էլ թանկացում չի, շուկայի կարգավորում է», - հայտարարեց Իգնատի Առաքելյանը։ Գերատեսչության ղեկավարը հավաստիացրեց, եթե խնդիրը հասնի նրան, որ կերի պակասություն լինի, ապա պատրաստ են այդ հարցը լուծել՝ ներմուծելով: Գյուղատնտեսության ոլորտում ունենք մի շարք խնդիրներ, որոնք լուծելով կհասնենք նրան, որ մեր գյուղատնտեսությունը կլինի մրցունակ, գրավիչ, ինդուստրիալ, իսկ գյուղատնտեսությամբ զբաղվողներն ավելի բարեկեցիկ կապրեն, նշեց ՀՀ գյուղատնտեսության նախարար Իգնատի Առաքելյանը: Գյուղատնտեսության առջև ծառացած խնդիրներն են` տեխնիկական հագեցվածության ցածր մակարդակը, ոռոգման համակարգի ոչ լիարժեք ապահովվածությունը,  մատչելի ֆինանսական ռեսուրսների խնդիրը, ապահովված չենք բնակլիմայական աղետներից, թույլ կրթական համակարգ ունենք: Բացի այդ, ըստ նախարարի, իրացման գների և գյուղացիների վճարումների հետ կապված նույնպես խնդիրներ կան, ինչպես նաև բացակայում է գյուղատնտեսական հողերի օգտագործելության ճիշտ գնահատական ու օրենսդրական դաշտում առկա են որոշ բացեր,-ասաց նա: «Սրանք խնդիրներ են, որոնք հնարավոր չէ 1 տարվա ընթացքում լուծել, սակայն մենք         արդեն իսկ քայլեր ենք ձեռնարկում դրանց լուծման համար: Օրինակ, գյուղտեխնիկայի խնդրի լուծման համար նոր ծրագիր կա՝ գյուղտեխնիկայի ձեռքբերում` մեր տնտեսած գումարների հաշվին: Լիզինգի ծրագրով այս տարի 132 միավոր գյուղտեխնիկա ենք տրամադրել: Ծրագրի շրջանակներում մինչև տարեվերջ կտրամադրվի 120 միավոր գյուղտեխնիկա՝ շուրջ 550 մլն դրամի. կոոպերատիվը վճարում է ձեռք բերվող տեխնիկայի գումարի 20 տոկոսը, իսկ 80 տոկոսը պետությունն է տրամադրում»,- ասաց Առաքելյանը: «Մթերման ու վճարումների հետ կապված այս տարի խնդիրներ չկան, չնայած նրան, որ նախորդ տարվանից կան պարտքեր: Ավելին  մթերման համար տրամադրվում են 3 տոկոսանոց վարկեր, սակայն դրանք տրամադրվում են այն սկզբունքով, որ փողն ուղիղ գյուղացիներին տրվի:   3 տոկոսանոց վարկեր 1 տարով` նման բան չկա աշխարհում:  2018-ին էլ կսկսենք կաթիլային համակարգով ոռոգումը՝ 2 տոկոսանոց վարկերով`  12 տոկոսը կսուբսիդավորի պետությունը: Կարկտապաշտպանության համակարգեր տեղադրելու վարկերը նույնպես կլինեն 2 տոկոսանոց վարկով, իսկ ինտենսիվ այգիները՝ 5 տոկոս վարկով»,-ասաց նախարարը: